كامێرای Ubi دوا داهێنان نییە لەتەكنۆلۆژیای كامێرای دیجیتالیدا، بەڵام هەتا ئێستا داهێنانێكی نوێ و سەرنجڕاكێشە، نەك لەبەر ئەوەی كە كامێراكە لەگەڵ بچووكیدا توانای زۆری هەیە، بگرە لەبەر ئەوەی كە ئێوە دەتوانن تەنیا بەپەنجەكانی خۆتان هەروەك لەوێنەكەدا دەیبینن چوارچێوەی وێنەكە بكێشن و كامێراكە وێنەیەك بەپێی چوارچێوەكە دەگرێت.
كامێرای Ubi لەسەری پەنجەكانتان دەخرێت و ئەمە شێوازێكی نوێیە لەوێنەگرتن كە بەشێوەیەكی سادە و ساكار ئەركەكانی ئاسان كردۆتەوە. هەروەك ئاماژەی پێدرا ئێوە دەبێ كامێراكە لەسەری یەكێك لەپەنجەكانتان دابنێن، ئەو پەنجەیە دەبێتە ڕێنوێنی كامێراكە، پاشان بەپەنجەكانی دیكەتان چوارچێوەی وێنەكە دیاری بكەن، كامێراكە هەستەوەرێكی لەگەڵدایە كە مەودای نێوان كامێرا و ئەو دیمەنەی كە وێنەی دەگرێ دیاری دەكات و لەچوارچێوەكەی دەخات.