ئەم ئۆتۆمبێلەی دەیبینن بریتییە لە ئۆتۆمبێلێكی ناوازەی بووك گواستنەوە كە رەنگە تەنها لە وڵاتانی دەرەوە شتی وامان دیبێت، یان لە ماڵپەڕەكان سەیرمان كردبێت، بەڵام ئەمە لە هەولێری پایتەخت هەیە و بۆ رۆژی هاوسەرگیری كە رۆژێكی دانسقەو دەگمەنە لە ژیانی هەر كەسێك، ئامادە دەكرێت. بووك زاواكان دەیانەوێت لەو رۆژەدا جیاوازتر و جوانتر بەدیار بكەون و هەریەكەشیان بەشێوەیەك ئەو هەستە دەردەبڕن. ئەوەتا گەنجێكی شاری هەولێر بە ناوی (سیروان سابیر هەمەوەندی)، لە رۆژی هاوسەرگیری براكەیدا، ئۆتۆمبێلەكەی بە شێوەیەكی سەیر رازاندۆتەوە و جیاوازە لەو شێوازە تەقلیدییەی كە هەیە.
سیروان نیوەی ئۆتۆمبێلەكەی رەش كردووە، لەسەر سەقفی ئۆتۆمبێلەكەش كڵاوێكی دەستكردی داناوە كە گوزارشتە لە جلی فەرمیی زاوا. لایەكی دیكەی ئوتۆمبێلەكەی سپی كردووە، كە گوزارشتە لە جلی سپی بووك و لە سەریشەوە تاجێكی وەك تاجەسەری بووكی لەسەر داناوە، بۆ دەربڕینی هێمای خۆشی و بەختەوەریش لە پشتەوەی ئوتۆمبێلەكە دوو لەزگەی ستیكەری (لكێنەری) شێوە سەری جیاوازی داناوە، یەكێك بۆ زاوا، ئەویتریش بۆ بووكە خان.