رۆژی شەمە، 1ی ئایاری 2021 هێزەكانی ئەمریكا دەستیان بەپرۆسەی كشانەوە لە ئەفغانستان كرد و، بریارە هەتا 11ی ئەیلوولی داهاتوو پرۆسەكە كۆتایی پێبیت و ، هیچ هێزێكی ئەمریكی و ناتۆ لەو وڵاتە نەمێنن.

بەرواری 1ی ئایار بۆ دەسپێكردنی كشانەوەی هێزەكانی ئەمریكا لە ئەفغانستان، بەرەنجامی ئەو ڕێكەوتنەیە كە ئیدارەی پێشووی ترەمپ لەگەڕ هیزەكانی تالیبان ئیمزای كردبوو ، لەگەڵ ئەوەی بەپێی ئەو رێكەوتنە دەبوو هیزەكانی ئەمریكا لەم بەروارە بەتەواوەتی كشابوونایەوە، بەڵام ئیدارەی تازەی ئەمریكا بەسەرۆكایەتی جوزیف بایدن ، هەموو هەوڵێكی خستەگەر بۆ ئەوەی پیش 1ی ئایار ریككەوتنی ئاشتی لە نیوان تاڵیبان و حكومەتی ئەفغانستان بە ئەنجام بگەیەنێت و تالیبان بە شدار ئەو حكومەتە كاتیە بكات كە زەمینە بۆ هەڵبژاردنی داهاتووی ئەفغانستان خۆش دەكرد و ، وا بریاریش بوو كە تالیبان بەشدار ئەو كۆبوونەوەیە بكات كە بەچاودێری نەتەوەیەكگرتووەكان بریار بوو لە توركیا ئەنجامبدرێت، بەڵام مەرجەكانی تالیبان بوونە رێگر و نەتوانرا ئەو كۆبوونەوە نیودەوڵەتیە بۆ چارەسەری كێشەی نێوان تالیبان و حكومەتی ئەفغانستان ئەنجام بدرێت.

چاودێرانی باردۆخی سیاسی ئەفغانستان ، كشانەوەی هێزەكانی ئەمریكا لە وڵاتە بە مەترسیەكی گەورە بۆ سەر ئایندەی ئاسایشی حكومەتی ئەفغانستان دەزانن و مەزندەی ئەوە دەكەن كە دوای كشانەوەی تەواوی هێزەكانی ئەمریكا و ناتۆ ، ئەوا هێزەكانی تاڵیبان وەرچەرخان لەو بۆ شاییە دروست دەكەن كە ئێستا بە – بۆشایی دەسەڵات- لە ئەفغانستان ناو دەبرێت و ، تالیبان خۆی ئەو بۆشاییە پڕدەكاتەوەو، هیچ بە دووری نازانن كودەتایەكی سەربازی و سیاسی بەسەر حكومەتی ئەفغانستان بكات و هەمان ئەو ئیماراتە دروستبكاتەوە كە لە ساڵی 2001 ئەمریكا ، هاوپەیمانی نێودەوڵەتی بۆ رووخاندنی پێكهێنا.

(ئامادەكرنی گوڵان)