به‌رپرسێكی یه‌كێتی ئه‌وروپا رایگه‌یاند، ئه‌مریكا، ئێران و وڵاتانی ئه‌ندام له‌ رێككه‌وتننامه‌ی ئه‌تۆمی هه‌وڵدەدەن له‌ماوه‌ی دو مانگدا رێككه‌وتننامه‌ی ئه‌تۆمی ساڵی 2015 زیندوبكه‌نه‌وه‌، به‌ پابه‌ندبونی ئه‌و دوڵاته‌ به‌ دو پاكێچی جیاواز، كه‌ واشنتن له‌رێگەی ئه‌و پاكێجه‌وه‌ ده‌توانێت سزاكانی هه‌ڵبگرێت و ئێرانیش پابه‌ندبێت به‌سنورداركردنی به‌رنامه‌ ئه‌تۆمیه‌كه‌یه‌وه‌.

به‌پێی هه‌واڵێكی ئاژانسی رۆیته‌رز، به‌رپرسێكی یه‌كێتی ئه‌وروپا رایگه‌یاند، "گفتوگۆكانی نێوان ئەمریکا و ئێران له‌ ڤییەنا تیشك ده‌خاته‌ سەر دو پاكێچ‌، یه‌كێكیان په‌یوه‌ندی به‌ پابەندییە ئەتۆمییەکانه‌وه‌ ده‌بێت له‌لایه‌ن ئێرانه‌وه و‌ ئه‌وه‌ی دیكه‌یان په‌یوه‌ندی به‌ لیستی سزاکانه‌وه‌یه‌، كه‌ ئه‌مریكا سه‌پاندویه‌تی به‌سه‌ر ئێراندا و ده‌كرێت له‌ ئاینده‌یه‌كی نزیكدا هه‌ردو لیسته‌كه‌ بكرێن به‌یه‌ك".

هه‌مو لایه‌نه‌كانی رێككه‌وتننامه‌ی ئه‌تۆمی ئێران كۆكن كه‌ ئه‌و رێككه‌وتننامه‌یه‌ كارابكرێته‌وه‌ له ‌ماوه‌ی 2 مانگدا

ئاماژەی بەوەشکردوە، هه‌مو لایه‌نه‌كانی رێككه‌وتننامه‌ی ئه‌تۆمی ئێران كۆكن كه‌ ئه‌و رێككه‌وتننامه‌یه‌ كارابكرێته‌وه‌ له ‌ماوه‌ی 2 (دو) مانگدا، بۆیه‌ شاندی ئه‌مریكا سێشه‌ممه‌ی داهاتو ده‌گه‌نه‌ ڤییەنا بۆ ده‌ستپێكدرنه‌وه‌ی دانوستاندنه‌كانی نێوان ئێران و وڵاتانی (5+1).

ئاماده‌ین راستەوخۆ لەگەڵ ئێران کۆببینەوە

هاوكات وەزارەتی دەرەوەی ئەمریکا له‌ راگه‌یاندراوێكدا بڵاویکردەوە، "لە میانی کۆبونەوەکانی گەڕانەوە بۆ رێککەوتنی ئەتۆمی کە بڕیارە له‌ ڤییەنا-ی پایتەختی نەمسا بەڕێوەبچێت، ئاماده‌ین راستەوخۆ لەگەڵ ئێران کۆببینەوە، ئەوه‌ش هه‌نگاوێكی باشه‌ بۆ كاراكردنه‌وه‌ی ئه‌و رێككه‌وتننامەیە".

دوێنێ هه‌ینی، نوێنەرانی یەکێتی ئەوروپا، چین، فڕەنسا، ئەڵمانیا، روسیا و بریتانیا لەگەڵ بەرپرسە ئێرانییەکان لە رێگەی ڤیدیۆ کۆنفرانسەوە بە مەبەستی تاوتوێکردنی گەڕانەوەی ئەمریکا بۆ رێککەوتنە ئەتۆمییەکە کۆبونەوە.

6ی (نیسانی/4) داهاتو بڕیارە له‌ ڤییەنا هەریەکە لە ئێران و وڵاتانی (5+1)له‌باره‌ی زیندوكردنه‌وه‌ی رێككه‌وتننامه‌ ئه‌تۆمیه‌كه‌ی ساڵی 2015 كۆببنه‌وه‌ و گفتوگۆی پابه‌ندییه‌كانی ئێران و گه‌ڕانه‌وه‌ی ئه‌مریكا بۆ ئه‌و رێككه‌وتنه‌ بكه‌ن.







خه‌ندان