دەزگای هەواڵگریی ئەمریکا ئاشکرای دەکا، کە رێبەری باڵای ئێران فەرمانی دەستوەردان لە هەڵبژاردنی سەرۆکایەتیی ئەمریکای داوە.

لە راپۆرتێکدا، کە نووسینگەی بەڕێوەبەری هەواڵگریی نیشتمانیی ئەمریکا بڵاوی کردووەتەوە، ئێران لە چەند روویەکەوە و بە نهێنی بۆ شکتهێنان بە دۆناڵد ترەمپی سەرۆکی پێشووی ئەمریکا لە هەڵبژاردندا، هێرشی کردووە.

دەزگای هەواڵگریی ئەمریکا ئاماژەی بەوە کردووە، کە ئێران ویستوویەتی ”ناکۆکی و ئاژاوەی کۆمەڵایەتی لە ئەمریکا، دروست بکات“.

هەروەک لە راپۆرتەکەدا هاتووە، هەوڵەکانی ئێران بۆ شکستهێنان بە ترەمپ، بە فەرمانی ئایەتوڵڵا عەلی خامنەیی، رێبەری باڵای ئێران بووە.

رۆژی 3-11-2020 هەڵبژاردنی سەرۆکایەتیی ئەمریکا بەڕێوەچوو و تێیدا دۆناڵد ترەمپی سەرۆکی پێشوو (2017-2021) بەرامبەر جۆ بایدنی کاندیدی دیموکراتەکان، شکستی هێنا.

ترەمپ لەماوەی چوار ساڵی دەسەڵاتیدا، دژایەتییەکی توندی ئێرانی کرد و چەندین سزای بەسەردا سەپاند، جگە لە دەرکردنی فەرمانی کوشتنی قاسم سولەیمانی، فەرماندەی سوپای قودس.





باسنيوز