لەسەر هەوڵی سووتاندنی باڵیۆزخانەی چین، پۆلیسی ئەڵمانیا پیاوێکی دەستگیرکرد
لە راگەیێندراوێکدا پۆلیسی ئەڵمانیا باسی لەوە کردووە "ئەم بەیانییە ئەفسەرانی پۆلیس کەسێکیان دەستگیرکردووە کە تۆمەتبارە بە هەڵدانی ماددەی گڕکەرەوە و سووتێنەر بۆ نێو حەوشەی باڵیۆزخانەی چین لە بەرلین".
بە گوتەی پۆلیس، تۆمەتبارەکە ماددەکەی فڕێداوەتە نێو حەوشەی باڵیۆزخانە و بەر دیواری باڵەخانەکە کەوتووە، بەڵام ستافی باڵیۆزخانە هەر زوو ئاگرەکەیان کوژاندووەتەوە، چەند کەسێک پیاوە 42 ساڵەکەیان دەستبەسەرکردووە تاوەکو پۆلیس گەیشتووەتە شوێنی رووداوەکە و تۆمەتبارەکەی دەستگیرکردووە.
چین تەنیا وڵاتە باڵیۆزخانەی لە شەقامی برووکنستراس لە بەرلین هەبێت، ئەو شەقامە ناوەندی بەرلین بە هەردوو ناوچەی میتە و کراتزبێرگ دەبەستێتەوە کە ئەوانیش دوو ناوەندی جەنجاڵی پایتەختی ئەڵمانیان.
پۆلیسی ئەڵمانیا هیچ زانیارییەکی لەبارەی لێکۆڵینەوە و بەدواداچوون بۆ هۆکاری ئەنجامدانی ئەو رووداوە ئاشکرانەکردووە، بەڵام لەوکاتەوەی کۆرۆنا بڵاوبووەتەوە، چین رووبەڕووی رەخنە و لێدوانی تووند بووەتەوە.
ئەنگێلا مێرکل، راوێژکاری ئەڵمانیا رەخنەی لە پەکین گرتووە کە لە سەرەتاکانی بڵاوبوونەوەی ڤایرۆسەکە رێوشوێنی پێویستی نەگرتەبەر تاوەکو وایلێهات بووە پەتایەکی جیهانی.
rudaw -
