فڕۆکە جەنگییەکانی ئیسرائیل 25 بارەگای بزووتنەوەی بەرگریی ئیسلامیی فەلەستینی (حەماس) بپردومان دەکەن و ئەو رێکخراوەش داوای راگرتنی شەڕ دەکات.



خەلیل حەییە، ئەندامی مەکتەبی سیاسیی حەماس لە بەیاننامەیەکدا رایگەیاندووە، گرووپە ئیسلامییەکانی کەرتی غەززەی فەلەستین ئامادەن بۆ رێککەوتن و راگرتنی شەڕ لەگەڵ ئیسرائیل، بەو مەرجەی ”ئیسرائیل هێرشەکانی بووەستێنێت“.



بەپێی هەواڵی میدیا عەرەبییەکان، درەنگانی شەوی سێشەممە 29/5/2018، فڕۆکە جەنگییەکانی ئیسرائیل 25 ناوچەیان لە کەرتی غەززە بۆردومان کردووە و کەناڵی جەزیرەش ئاماژەی بەوە داوە، کە شوێنە بۆردومانکراوەکان بارەگای حەماس و بزووتنەوەی جیهانی ئیسلامی بوون.



ئەو بۆردومانەی فڕۆکە جەنگییەکانی ئیسرائیل دوای ئەوە دێت، کە رۆژی سێشەممە گرووپە توندڕەوەکانی کەرتی غەززە بە 50 مووشەک ئیسرائیلیان کردە ئامانج و دواتر هەر لە رۆژی سێشەممەدا، فڕۆکە جەنگییەکانی ئیسرائیل ژمارەیەک هێرشیان کردە سەر کەرتی غەززە.





باسنيوز