چەند تەقینەوەیەک لە بنکەیەکی سەربازیی ئێرانیدا لە نزیک دیمەشقی پایتەختی سووریا روویان دا.



بەپێی زانیارییە بڵاوکراوەکان، تەقینەوەکان درەنگانی شەوی یەکشەممە 20/5/2018 لە قوتابخانەی ئاسایش لە نەجها لە گوندەوارەکانی دیمەشق لە نزیک فڕۆکەخانەی نێودەوڵەتیی دیمەشق روویان داوە.



ئەو قوتابخانەیە، کە کەوتووەتە باشووری دیمەشق، لەلایەن هێز و میلیشیا ئێرانییەکان وەک بارەگایەکی سەرکردایەتیی شەڕی ئەلیکترۆنی بەکار دەهێندرێت.



تا ئێستا هیچ سەرچاوەیەکی رژێمی سووریا و ئێران ئەو هەواڵەی پشتڕاست نەکردووەتەوە و هیچ زانیارییەکیش لەبارەی هۆکار و ژمارەی کوژراو و بریندارەکان بڵاو نەکراوەتەوە.



لە سەرەتای شەڕی ناوخۆیی سووریاوە، ئێران بە ناردنی چەک و میلیشیای چەکداری، هاوکاریی رژێمی سووریا دژی گرووپە ئۆپۆزیسیۆنەکان دەکات.



لە مانگی ئاداری 2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.



بەهۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن هاووڵاتیی لە ناوخۆی وڵاتەکە، بۆ وڵاتانی دەوروبەر و جیهان ئاوارە بوون و زیاتر لە نیو ملیۆن کەسیش گیانیان لەدەست داوە.




باسنیوز