دوای زیاتر لە حەوت ساڵ شەڕی ناوخۆیی، رژێمی سووریا دەست بەسەر زۆرینەی خاکی وڵاتەکەیدا دەگرێتەوە.



لە راگەیەندراوێکدا، روانگەی سووری بۆ مافەکانی مرۆڤ رایگەیاندووە، پێش یەکەم کۆبوونەوەی ئاستانە بۆ بەرقەرارکردنی ئاشتی لە سووریا، رژێمی سووریا تەنیا %19.3ـی خاکی وڵاتەکەی لەژێر دەستدا بوو.



روانگەی سووری بۆ مافەکانی مرۆڤ لە سووریا هەروەها رایگەیاندووە، کە ئێستا %60ـی خاکی سووریا لەژێر دەسەڵاتی رژێمدایە، کە بەشار ئەسەد سەرۆکایەتی دەکات.



رێژەی هەژموونی لایەنە جیاوازەکان پێش کۆبوونەوەکانی ئاستانە (هەروەک روانگەی سووری رایگەیاندووە):



- %39.1ـی خاکی سووریا لەژێر داگیرکاریی رێکخراوی تیرۆریستی داعشدا بوو.

- %22.1ـی خاکی سووریا لەژێر دەسەڵاتی هێزەکانی سووریای دیموکرات (هەسەدە)دا بوو.



- %19.3ـی خاکی سووریا لەژێر دەسەڵاتی رژێمی سووریادا بوو.

- %19.2ـی خاکی سووریا لەلایەن گرووپە توندڕەوەکانی ئۆپۆزیسیۆن دەستی بەسەردا گیرابوو.



یەکەم کۆنگرەی ئاستانە لە 23و 24/1/2017 لە شاری ئاستانەی پایتەختی کازاخستان بە چاودێریی وڵاتانی رووسیا و تورکیا بۆ وەدیهێنانی ئاشتی لە سووریا، لە نێوان ئۆپۆزیسیۆن و رژێمی ئەو وڵاتەدا، بەڕێوە چوو.



لە مانگی ئاداری 2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.



بەهۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن هاووڵاتیی لە ناوخۆی وڵاتەکە، بۆ وڵاتانی دەوروبەر و جیهان ئاوارە بوون و زیاتر لە نیو ملیۆن کەسیش گیانیان لەدەست داوە.



هەسەدە هێزێکی سەربازییە و بە پشتیوانیی ئەمریکا بۆ رزگارکردنەوەی ناوچە داگیرکراوەکانی رۆژئاوای کوردستان و سووریا لە رێکخراوی تیرۆریستی داعش، پێکهاتووە. یەکینەکانی پاراستنی گەل (یەپەگە)ی باڵی سەربازیی پارتی کرێکارانی کوردستان (پەکەکە) باڵی سەرەکیی ئەو هێزەیە.






باسنیوز