ژمارەیەک بنکەی سەربازیی رژێمی سووریا لە باکووری رۆژئاوای ئەو وڵاتە بۆردومان کران.



بەپێی هەواڵێکی ئاژانسی (سانا)ی فەرمیی رژێمی سووریا، شەوی یەکشەممە 29/4/2018 بنکە سەربازییەکان لە هەردوو پارێزگای حەما و حەلەب بە مووشەک بۆردومان کراون.



رووانگەی سووری بۆ مافەکانی مرۆڤ رایگەیاندووە، کە دوو لەو بنکە سەربازییە بۆردومانکراوانە سەرباز و میلیشیا ئێرانییەکانیان تێدا بووە.



تا ئێستا هیچ لایەنێک بەرپرسیارێتیی خۆی لە بۆردومانکردنی ئەو بنکە سەربازییانە رانەگەیاندووە.



کۆماری ئیسلامیی ئێران لە سەرەتای شەڕی ناوخۆیی سووریاوە، بە ناردنی هاوکاریی سەربازی و میلیشیا چەکدارییەکان، هاوکاریی رژێمی سووریا لە دژی گرووپە چەکدارییە ئۆپۆزیسیۆنەکان، دەکات.



لە مانگی ئاداری 2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.



بەهۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن هاووڵاتیی لە ناوخۆی وڵاتەکە، بۆ وڵاتانی دەوروبەر و جیهان ئاوارە بوون و زیاتر لە نیو ملیۆن کەسیش گیانیان لەدەست داوە.



باسنیوز