ژمارەیەک چەکداری نەناسراو هێرش دەکەنە سەر ئەکادیمیای سەربازیی لە کابوڵی پایتەختی ئەفغانستان.



بەپێی هەواڵی ئاژانسە جیهانییەکان، هێرشە چەکدارییەکە سەرلەبەیانیی رۆژی دووشەممە 29/1/2018 رووی داوە و چەکدارەکان شکستیان هێناوە و نەیانتوانیوە بگەنە ناو ئەکادیمیای سەربازیی مارشاڵ فەهیم، تاوەکو تێیدا کردەی تیرۆریستی ئەنجام بدەن.



سەرچاوە ئەمنییەکانی ئەفغانستان رایانگەیاندووە، هێزە ئەفغانییەکان رووبەڕووی ئەو چەکدارانە بوونەتەوە و بەپێی ئامارە سەرەتاییەکان، 15 کەس لە هەردوولا کوژراون و برینداربوون.



ماوەیەکە تقینەوە و کردەی تیرۆریستی لە کابوڵ روو دەدەن، کە دوایین کردەی تیرۆریستی بریتی بوو لە تەقینەوەیەکی گەورە، کە لەڕێی ئەمبوڵانسێکی بۆمبڕێژکراو رووی دا و بووە هۆی گیان لەدەستدانی 95 کەس و برینداربوونی زیاتر لە 150 کەسی دیکە.



دوای هێرشە تیرۆریستییەکە، رێکخراوی تیرۆریستی داعش لە ئەفغانستان بەرپرسیارێتیی خۆی لە هێرشەکە راگەیاند.



باسنیوز