بەپێی ڕاپۆرتی میدیا فەرمییەکانی ئێران، کاتژمێریك لەمەوبەر ڤلادیمیر پۆتین، سەرکۆماری ڕووسیا گەیشتە تاران و لە فڕۆکەخانەی نێودەوڵەتیی مێهرئاباد لەلایەن وەزیری دارایی ئێرانەوە پێشوازیی لێ کرا.

لەدوای کابینەی دوازدەی حکوومەتی ئێران، ئەمە یەکەم سەفەری پۆتینە بۆ تاران و لە ماوەی سەرۆکایەتیی ڕووسیادا ئەمە سێیەمین سەردانیی فەرمییە بۆ تاران.

شاندێکی سەربازیی ڕووسیاش بە سەرۆکایەتیی سەرۆکی هێزە چەکدارەکانی ئەو وڵاتە لە تارانە و لەگەڵ سەرۆکی ئەرکانی هێزە چەکدارەکانی ئێران کۆ بووەتەوە.

بڕیارە ئێوارەی ئەمڕۆ دانیشتنی سێ لایەنەی ئێران ڕووسیا و ئازەربایجان، بەمەبەستی پتەوکردن و پەرەپیدانی هاوکارییەکانی نێوانیان لە تاران دەست پێ بکات.

پۆتین ساڵی 2015ش سەردانی تارانی کرد و لەگەڵ عەلی خامنەیی ڕێبەری باڵای کۆماری ئیسلامیی ئێران کۆ بووەوە.

بڕیارە لەو دیدارە سێ لایەنەدا ڕێککەوتن و گرێبەست لەبارەی ژێرخانی ڕێگەبان (شەمەندەفەر) لە چوارچێوەی (پرۆژەی باشوور بۆ باکوور) و بەدواداچوون بۆ ڕێککەوتنە ترانزیتەکانی پێشوو بکرێت و هەنگاویان بۆ هەڵبگیرێت.

بڕیارە ئەمڕۆ سەرکۆماری ڕووسیا بۆ نۆیەمەین جار لەگەڵ حەسەن ڕۆحانی سەرکۆماری ئێران لە کۆشکی سەعدئابادت تاران کۆ ببێتەوە.










باسنيوز