ئەمیری قەتەر جۆرێک لە نەرمی بەرامبەر چوار وڵاتە عەرەبییەکە دەنوێنێت.



شێخ تەمیم بن حەمەد ئال سانی، ئەمیری قەتەر لە لێدوانێکی رۆژنامەوانیدا سوپاسی کوێتی کرد بۆ هەوڵدان بۆ نیوەندگیریی نێوان قەتەر و چوار وڵاتە عەرەبییەکە و هیوای خواستووە کوێت لە هەوڵەکانی ”سەرکەوتوو بێت“.



شێخ تەمیم بن حەمەد ئال سانی ئامادەیی قەتەری بۆ گفتوگۆکردن لەگەڵ چوار وڵاتە عەرەبییەکە و چارەسەرکردنی کێشەکان نیشان داوە و رایگەیاندووە: ”بەڵام پێویستە چارەسەکردنەکە گەرەنتیی دووبارە نەبوونەوەی ئەم شێوازەی دژایەتیکردنی قەتەر، بکات“.



ئەمیری قەتەر داوای لەو چوار وڵاتە کردووە، کە پێویستە خەڵکی ئاسایی و هاووڵاتییان لە ناکۆکییە سیاسییەکان دوور بخرێنەوە.



پێشتر بەرپرسانی قەتەر داوای پچڕاندنی پەیوەندییەکانی ئەو وڵاتەیان لەگەڵ ئێران و رەوتی ئیخوان موسلیمینی جیهانی رەت کردبووەوە و ئاماژەیان بەوە کردبوو، کە گفتوگۆ لەبارەی ئەو داوایانەوە ناکەن.



رۆژی دووشەممە 5.6.2017، بەهۆی “بوونی پەیوەندیی قەتەر بە کۆماری ئیسلامیی ئێران و دروستکردنی مەترسیی تیرۆر و توندڕەوی لەسە وڵاتەکانیانەوە”، هەر چوار وڵاتی سعودیە، میسر، ئیمارات و بەحرێن بڕیاریان دا هەموو پەیوەندییەکانیان لەگەڵ قەتەر بپچڕێنن.



قەتەر وڵاتێکی کەنداوی عەرەبییە، ژمارەی دانیشتووانەکەی (بەپێی ویکیپێدیا) یەک ملیۆن و 800 هەزار کەسە، کە 300 هەزاریان هاووڵاتیی ئەو وڵاتەن و یەک ملیۆن و 500 هەزار کەسیش بێگانەن و مافی نیشتەجێبوونیان لە قەتەر وەرگرتووە.

باسنيوز