تۆمەتباری سەرەکیی هێرشە تیرۆریستییەکانی 11ـی سێپتێمبەر دوای هەفتەیەک لە دەستبەکاربوونی سەرۆکی هەڵبژێردراو، دادگایی دەکرێت.



بڕیارە رۆژی 20ـی ئەم مانگە دۆناڵد ترەمپ، سەرۆکی هەڵبژێردراو وەک سەرۆکی ئەمریکا دەستبەکار بێت و دوای شەش رۆژیش، دادگاییکردنی خالید شێخ محەمەد، هاووڵاتیی کوێتیی بە رەگەز پاکستانییە و پلانداڕێژەری هێرشە تیرۆریستییەکانی 11ـی سێپتێمبەر بەڕێوە بچێت.



پرۆسەی دادگاییەکە، کە بڕیارە تاوەکو رۆژی 3/2/2017 درێژە بکێشێت، لەلایەن وەزارەتی بەرگریی ئەمریکاوە تۆمار دەکرێت، بەڵام دواتر بڕیار دەدرێ بڵاو بکرێتەوە یاخود نا.



رۆژی 11ـی 9ـی 2001، چەکدارانی توندڕەو رێڕەوی سێ فڕۆکەیان گۆڕی و ناچاریان کردن خۆیان بە سەنتەری بازرگانیی جیهانی لە نیویۆرک و وەزارەتی بەرگریی ئەمریکا لە واشنتن بکێشن، لە ئەنجامدا باڵەخانەی سەنتەری بازرگانیی جیهانی داڕما و بەهۆی هێرشەکانەوە نزیکەی سێ هەزار کەس گیانیان لەدەست دا.



دوای هێرشە تیرۆریستییەکان، رێکخراوی توندڕەوی قاعیدە، کە بنکەی سەرەکیی لە ئەفغانستان بوو، بەرپرسیارێتیی خۆی لە هێرشەکان راگەیاند و لە مانگی 10ـی هەمان ساڵیش ئەمریکا هێرشی کردە سەر ئەفغانستان و رژێمی تاڵیبانی رووخاند، کە پشتگیریی قاعیدەی دەکرد.
bas news-