پەرلەمانتارێکی کورد لە دیمەشق رایدەگەیەنێت، کە حکوومەتی وڵاتەکەی پتگیریی بەردەوامی یەکینەکانی پاراستنی گەل دەکات.

عومەر ئۆسێ، پەرلەمانتاری کورد لە پەرلەمانی رژێمی سووریا بە میدیاکانی سەر بە رژێمەکەی راگەیاندووە، کە هێزێکی کوردی-سووری بە ناوی ”هێزی بەرگریی نیشتیمانیی سووری-کوردی“ لە کوردستانی رۆژئاوا دروست کراوە.

عومەر ئۆسێ ئاماژەی بەوە کردووە، کە دروشمی هێزەکە ئاڵای فەرمیی رژێمی سووریایە و چەندین چەکداریان لە شارەکانی عەفرین، کۆبانی، قامیشلۆ و حەلەب هەیە.

ئەو پەرلەمانتارە هەروەها رایگەیاندووە، کە هەرچەندە ناوە ناوە ناکۆکییەک لە نێوان یەپەگەی باڵی سەربازیی پارتی یەکێتیی دیموکراتی (پەیەدە) و سوپای رژێمی سووریا دروست دەبێت، بەڵام رژێمی سووریا بە سەرۆکایەتیی بەشار ئەسەد ”پشتگیریی تەواو“ی یەپەگە دەکات.

هەروەک عومەر ئۆسێ رایگەیاندووە، هەماهەنگیی بەردەوام لەنێوان یەپەگە و رژێمی سووریادا هەیە و ژووری ئۆپەراسیۆنی هاوبەشیشیان هەیە بە سەرپەرشتیی رژێمی سووریا.

پێشتر رێزان حەدۆ، سەرۆکی مەکتەبی سیاسیی هێزی بەرگریی نیشتیمانیی سووری-کوردی و گوتەبێژی کانتۆنی عەفرین، کە پەیەدە دروستی کردووە، رایگەیاندبوو، کە هێزەکانیان شان بەشانی سوپای سووریا و لەژێر ئائڵای رژێمی سووریا شەڕ دەکەن.













باسنيوز