گرووپێک لە زانایانی شوێنەواری ئیسڕائیلی و کۆمەڵێک قوتابی، گۆزەیەکی لە قوڕ دروستکرای تەمەن 3800 ساڵە لە میانی قۆڵکردن و گەڕان لە یەکێک لە کەناراوەکانی ئیسڕائیل دەدۆزنەوە.
ئەو پارچە شوێنەوارە کە گۆزەیەکی قوڕینە و سەرەکەی وێنەی پیاوێکە کە دانیشتووە و دەستەکانی لە ژێر چەناگەیەتی، وەک ئەوە وایە بیر دەکاتەوە، ھاوشێوەی پەیکەری بڕۆنزی ئۆگەست ڕۆدان، شێوەکاری بەناوبانگی فەڕەنسی.


زانایانی شوێنەواری ئیسڕائیلی، پەیکەرەکەیان بۆ چاخی بڕۆنزی ناوەڕاست گەڕاندەوە، دەستەی شوێنەواری ئیسڕائیلیش ئەوەی ڕاگەیاند: "وێنەی پیاوەکەی سەر گۆزەکە 18 سانتیمەترە و لە حالەتی بیرکردنەوەیە".


جگە لەوانە، لە ئەنجامی ئەم گەڕان وپشکنیانە، چەندین کەرەستەی کانزایی وەک خەنجەر، تیر، دەسکی داس، ئێسکی گیانلەبەران دۆزراونەتەوە، دەستەی شوێنەواری ئێسڕائیل، ئەوە دەخاتەڕوو: "ئەو ئامێرانە، ھێ کەسێکی دیاری ئەو سەردەمەیە، بۆیە لەگەڵ ناشتنی، ئەو ئامێرانەشی ھەڵگیراوە، ئەو پارچانەی کە دۆزراونەتەوە، پارچەی دەگمەنن و پێشتر لە شێوەیان نەدۆزراونەتەوە، بۆیە پاراستنی و نمایشی کارێکی مێژووییە".