سەرۆک وەزیرانی فەرەنسا رایدەگەیەنێت، کە پەنابەرانی دارستانەکانی کاڵاس رەگەزنامەی فەرەنسی وەردەگرن.

رۆژی دووشەممە 24ـی تشرینی یەکەمی 2016، دەسەڵاتدارانی فەرەنسا دەستیان بە گواستنەوەی پەنابەرانی دارستانی کاڵاس کرد، کە پەنابەران وەک کەمپێک لێی دەژیان و بە شۆفڵ خانووە پەڕۆیینەکانیان رووخاند و کەمپەکەیان داخست.

مانوێڵ فالس، سەرۆک وەزیرانی فەرەنسا رایگەیاندووە، کە کەمپی کاڵاس وێنەیەکی ناشیرینی دابووە وڵاتەکەی و ”ناشمەوێ ئەو وێنەیە لە فەرەنسا ببینم“.

مانوـێڵ فالس موژدەی دایە پەنابەرانی ئەو کەمپە، کە گوازراونەتەوە تەواوی کەمپەکانی فەرەنسا، مافی پەنابەرێتیی وەردەگرن و ”سبەی دەبنە خاوەن رەگەزنامە و دەبنە پەرلەمانتار و وەزیریش لە فەرەنسا“.

دارستانی کاڵاس کەوتووەتە باکووری فەرەنسا و نزیکەی نۆ هەزار پەنابەر، کە زۆرینەیان خەڵکی وڵاتانی ئەفغانستان، عێراق، سووریا و لیبیان، تێیدا لە ژێر دار و خێوەتەکانی ناوچەکە دەژین و دەیانەوێ لەوێوە بچنە بەریتانیا.

بەهۆی قەیران و شەڕەکان لە رۆژهەلاتی ناوەڕاست و باکووری ئەفریقیا، ساڵانە دەیان هەزار هاووڵاتیی وڵاتانی عێراق، سووریا، ئەفغانستان و لیبیا و وڵاتانی ئەفریقیا بە گشتی وەک پەنابەر و بە رێگای نایاسایی، روودەکەنە وڵاتانی ئەوروپا.














باسنيوز