بەپێی هەواڵی هەواڵدەرییە فەرمییەکانی ئێران، ڕوحانی، سەرۆکۆماری ئێران لەگەڵ هەدیە خەلەف عەباس، سەرۆکی پەرلەمانی نوێنەرانی ڕژیمی ئەسەد لە تاران کۆبۆوە.

ڕوحانی لەو دانیشتنەدا پێداگرییەکی زۆری لەسەر هەبوونی پەیوەندیی دۆستانە لە نێوان ئێران و سووریا کرد.

ڕوحانی هەروەها باسی لە گرنگیی یەکپارچەیی خاکی سووریا کرد و گوتی: "یەکگرتوویی و یەکپارچەیی خاکی هەموو وڵاتانی جیهان و بەتایبەتی سووریا وەک ڕێسایەکی سەرەکییە و گۆڕین و گۆڕانکاریی سنوورەکان بە قازانجی ناوچەکە و لە بەرژەوەندیی کەسدا نییە."

ئەو لێدوانەی ڕوحانی لە کاتێکدا دێنە ئاراوە کە ئێران تا ئێستا چەندین جار دژایەتی خۆی لەگەڵ سەربەخۆیی هەرێمی کوردستانی باشوور و دابەشبوونی عێراق ڕاگەیاندووە، بەڵام لەلایەکی دیکەوە خۆی دەستتێوەردان لە کاروباری وڵاتانی یەمەن، عێراق، سووریا و وڵاتانی دیکەی عەڕەبیدا دەکات.

ڕوحانی لەمەڕ شەڕی سووریا گوتی: "ئەمڕۆ شەڕێکی زۆردارانە لەلایەن گرووپە تیرۆریستییەکانەوە کە پێبەندی هیچ ڕێسایەکی ئەخلاقی نین، بەسەر خەڵکی سووریادا سەپاوە و ئێمە دەبێ یارمەتیی خەڵکی سووریا لە بەربەرەکانی لەگەڵ تیرۆردا بدەین."

مەبەستی حەسەن ڕووحانی لە خەڵکی سووریا، ڕژیمی بەشار ئەسەد و هاوپەیمانەکانیەتی و لەو قسانەوە دەردەکەوێ کە ئەوان دژبەرانی ئەسەد بە خەڵکی سووریە نازانن.

کۆماری ئیسلامی لە ماوەی شەڕی 5 ساڵەی ناوخۆیی سووریا، چەندین گرووپی چەکداریی سەر بە سوپای قودسی لە سووریا جێگیر کردووە کە لە ناویاندا "فاتمیون و زەینەبیبون و …تاد کە بە پارێزەرانی حەرەم و ڕاوێژکارانی سەربازی ناویان دەبات، و تا ئێستا سەدان ئەندامی پلەبەرزی سپای تیرۆریستیی ئێران و ئەفغانیی ئەندامی ئەو سوپایە لە سووریا کوژراون.










باسنيوز