Di çarçoweya serdana xwe bo Parêzgeha Dihukê de Duh Serokwezîrê Kurdistanê birêz Nêçîrvan Barzanî li bajarê Dihukê bû û çendîn projeyên girîng yên xizmetgozarî li vê bajarî vekir.

Yekemîn proje ku, hate vekirin projeya damezrandina nexweşxaneyeke taybet bi şêrpence bû û ev nexweşxaneya han nexweşxaneyeke mezine ku, bi qasî 41 miliyon dolar bo çê kirina ev nexweşxaneya han hatiye amadekirin û biryare di nava 900 rojan de were amadekirin.

Tê payîn ku, bi amadebûn û destbikar kirina nexweşxaneya han, bi kiwalitiyeke baş xizmeta nexweşên şêrpence yên deverê û derdorê were kirin û dibe navendeke girîng bo wenêrîna nexweşên şêrpence li deverê.

Pişt re Serokwezîr û heyeta pê re bi awayeke fermî jî nexweşxaneya çavan li Dihukê vekir.

Ev nexweşxaneya han jî li ser bûdceya hikûmet bi qasî 10 miliyon dolaran hatiye damezrandin û xwedan baştirîn û pêşkeftîtirîn alaw û amrazên kontrol kirina çavaye.

Pişt re di civînekî de li gel birêveber û berpirsên nexweşxaneya han de Serokwezîrê Kurdistanê daxwaz ji wan kir daku, gelek girîngî bidin sîstema îdarî û paqêjiya nexweşxaneya han biparêzin.

Piştî vê yekê jî Serokwezîr û heyeta pê re navenda sereke ya nû a Şaredariyên deverê jî vekir û ev bînaya han jî bi awayekî fermî dest bi kar kir û Serokwezîrê Kurdistanê di peyvekî de jî daxwaz ji tevahiya stafa navenda han kir daku, di warê cîhbicîh kirina karûbarên welatiyan de gelek hişiyar bin û bilez karên welatiyan cîhbicîh bikin û bi her awayî xizmeta welatiyan bikin û nabe bi ti awayî welatî neçar bibin û cîhbicîh kirina karûbarên xwe demeke dirêj libendê bin.

Piştî vê yekê jî Serokwezîr ligel Parêzgar û birêvebirên îdarî yên Dihukê civiya û di civîna han de rewşa jiyan û rewşa îdarî ya parêzgeha han hate nirxandin û Serokwezîrê Kurdistanê guhdariya daxwaz, rexne û pêşniyarên karmend û berêveberên Deverê kir.

Her di vê civîna han de Parêzgarê Dihukê raportek li ser kêşeyên heyî yên li deverê û çawetiya baştir kirina jiyana xelkê deverê jî pêşkêşî Serokwezîr kir û Serokwezîrê Kurdistanê jî kêfxweşiya xwe a li hember serdana xwe bo Dihukê diyar kir û ragihand ku, me civîneke civata wezîran li Silimaniyeyê çê kiriye û emê civîneke din jî li Dihukê çê bikin.

Serokwerzîrê Kurdistanê di berdewamiya axaftinên xwe de behsa kêşe û arîşeyên heyî yên û daxwazên xelkê deverê jî kir û ragehand ku, Hikûmet bo çareser kirina wan kêşe û arîşeyan hewl dide.