Serokê Parlamentoya Iraqê daxwaz ji parlamenteran kir ku roja Yekşema dahatû civîneke awarte ji bo gotûbêjkirina daxwazên xwepêşanderan li dar bixin. Serokwezîrê Iraqê Nûrî Malîkî di daxuyaniya xwe ya duh de gef li xwepêşanderan xwar û got ku ger dawî li xwepêşandanan nehênin ew ê li dijî wan çek bi kar bînin. Lê belê Serokê Parlamentoyê Ûsame Nucef jî li Mûsilê daxuyand ku daxwazên xwepêşanderan rewa ne û soz da ku Madeya 4 a ku têkildarê ‘sûcên terorî’ ye, dê ji Makeqanûnê rabikin.

Nivîsîngeha Ragihandina Serokatiya Parlamentoya Iraqê ragihand ku Serokê Parlamentoya Iraqê Ûsame Nucefî daxwaz ji parlamenteran kiriye ku di saet 10:00’ê sibeha Yekşema dahatû ji bo civîneke awarte li Parlamentoyê amade bibin. Hat gotin ku bi armanca gotûbêjkirina daxwazên xwepêşanderan û aloziya ku niha bi Iraqê ketiye, dê ev civîna bê lidarxistin.

Piştî pasevanên Wezîrê Darayî yê Iraqê Rafîh Îsawî ji aliyê hêzên taybet ve hatin destgîrkirin, rewşa siyasî Iraqê her çû aloztir bû. Ji ber beşdarnebûna wezîran du car e civîna wezîran tê paşdexistin.

Roja Îniya hefteya borî jî bajarên ser bi parêzgeha Enbar, Tikrît û Mûsil ketin ber pêla xwepêşandanan. Heta niha jî rêya navneteweyî ya Iraq-Urdinê ji aliyê xwepêşanderan ve hatiye girtin.

Rudaw