Şêwirmendê navenda ayînî ya Şîe li bajarê Necefê yê Iraqê, Hucet ul Îslam Salih el Hekîm, li bajarê Hanofer yê Almanya, serdana mîrê êzîdiyan, Mîr Tehsîn kir û jê xwest ku ji bo zêdetir nêzîkbûna êzdî û şîeyan serdana Necefê bike.

Rojnamevan Heso Hormî, ku di hevdîtina Mîr Tehsîn û El Hekîmî de amade bû, ji Rûdawê re got ku Mîr Tehsîn nameyek ji Sîstanî re şand û jê xwest kuzextê li serokwezîrê Iraqê Nûrî Malikî bike da ku êrişên li dijî kurdan bide sekinandin û arîşeyên navbera hikûmeta navendî û Herêma Kurdistanê bi rêka destûrê bên çareserkirin.

Hormî, diyar kir ku mîrê êzdiyan, Mîr Tehsîn vexwendina şêwirmendê Sîstanî qebûl kiriye û dê di demek nêzîk de serdana Necefê bike. Mîr Tehsîn wê bi Sîstanî û zanayên din yên şîeyan re hevdîtin bike. Hormî got ku El Hekîm, behsa têkilî û bi bihevrejiyankirina êzdî û şîeyan kiriye û ev yek gelekî pêwîst dîtiye.

Rudaw