Karsazên kurd ên li Amedê ji bo çareserkirina pirsgirêka grevên birçîbûnê ya li girtîgehên Tirkiyeyê bi parlamenterên BDP’ê re hevdîtin pêk anîn. Parlamenterên BDP’ê di civînê de aşkera kirin ku encax helwesteke rast a parlamenterên kurd ên di nava AKP’ê de dikare helwesta tund a Recep Tayîp Erdogan biguherîne.

Civîn li Enqereyê pêk hat. Serokên Odeya Bazirganî û Pîşesaziyê ya Amedê (DTSO) Remzî Can, Serokê Borsayê Fahrettîn Akyil, nûnerên DESOB, GUNSÎAD, DÎSÎAD, GUNGÎAD, DÎGÎAD, MUSÎAD, OSGÎAD, DMD, TOBB, Lijneya Karsazên Ciwan a TOBB’ê, Odeya Endezyarên Makînayê û serokên hin saziyên sivîl çûn serdana BDP’iyan. Civîna karsazan bi Hevserokê Kongreya Civaka Demokratîk (KCD) Ahmet Turk, parlamenterên BDP’ê Ozdal Uçer, Sirri Sureyya Onder û Halîl Aksoy pêk hat.

Karsazan di hevdîtinê de ji parlamenterên BDP’ê bo pêşîlgirtina mirinan piştgirî xwest. Li ser rê û rêbazên çareseriya vê pirsgirêkê axaftin hatin kirin. Parlamenterên BDP’ê jî aşkera kirin ev hewldana karsazan girîng e û xwestin ev hewldan berdewam bikin. Li gorî agahiyên ku buroya çapameniya DTSO’yê dan, parlamenterên BDP’ê di civînê de diyar kirine Serokwezîrê Tirkiyeyê Recep Tayîp Erdogan zimanê tundiyê bi kar tîne û girtiyan dizêrîne. BDP’iyan destnîşan kir encax helwesta rast a parlamenterên kurd ku di nava AKP’ê de siyaset dikin, dikarin helwesta tund a Erdogan biguherînin û bandoreke erênî li ser pêvajoyê bikin.

Rudaw