Li gor ajansa nûçeyan ya Awisturyayê (APA), polîsên îtalî bi hevkariya polîsên awisturyayî û ekîbên li dijî mafyayê yên bajarê îtalî Trientê şebekeyek qaçaxçiyên mirovan têkbirin ku heta niha 1.543 mirov ji Iraqê derbasî Ewropayê kirine.
Di encama operasyona li dijî şebakeyê de, derbarê 62 kesan de lêpîrsin hatiye destpêkirin, ku di nav wan de 5 Kurdên hevwelatiyên Awisturyayê jî hene. Her pênc kesên tewanbar niha li Awisturyayê di girtîgehê de ne. Endamên şebakeyê bi wê yekê tên tewanbarkirin ku bi keştî û kamyonan bi qaçaxî penaber ji Iraqê derbasî Ewropayê kirine û ji her penaberekî derdorê 13 hezar Euro standine. Pirraniya endamên şebakeyê ji welatên bakurê Afrîkayê ne û li Îtalyayê dijîn.
Li gor lêkolînên polîsan, penaber bi rêya keştiyê ji Yûnan bo Îtalyayê hatine veguhestin û li wir jî ew li çar noqteyên şebekeyê yên li Tîrola Başûr, Friaul, Lombarday û Emîliya Romagna hatine veşartin û ji wir ji bo welatên Ewropayê hatine şandin.

Di sala 2008ê de li ser sînorê Îtalya û Awisturyayê penaberekî kurd û Kurdekî endamê şebekeyeke mirovan hatibûn girtin. Piştî girtina wan lêkolînên derbarê şebakeyê destpêkiribûn û ekîbên polîsan ji Almanya û Yûnan jî tevlî hevkariyê bibûn.

Rudaw