Li bajarê Silêmaniyê yê Herêma Kurdistanê, kampanya komkirina alîkariyê bo kurdên Sûriyê ji aliyê koma “Bangî Kurdayetî” ve hat destpêkirin.

Berpirsê koma Bangî Kurdayetî, Kemal Ebûbekir, ji rojnamevanan re ragihand, em bo ku piştevanî û hevxemiya xwe bo kurdên rojavayê Kurdistanê li Sûriyê nîşan bidin, kampanya komkirina alîkariyê dest pê kir.

Ebûbekir, diyar kir, koma me bi awayekî fermî hatiye avakirin û parêzgarê Silêmaniyê jî ev yek qebûl kiriye lê tu partî û aliyekî pişta koma me nagire û em xwe wek komek bêalî bo vê kampanyayê didin nasîn.

Berpirsê koma Bangî Kurdayetî, aşkere kir, em dixazin civînek din digel parêzgarê Silêmaniyê li bara çawaniya destpêkirina kampanyayê û dê ji wî bixazin ku bi rêya mizgeft û melayan ve bo kampanyaya han alîkarî bê kirin.

Kemal Ebûbekir, da zanîn, me ji parêzgehên Duhok û Hewlêrê jî xwestiye pişta vê kampanyayê bigirin û li wan parêzgehan jî alîkarî bo kurdên rojava bên komkirin û emê alîkariyên xwe bi rêya hîva sor a navdewletî bigihînin destê kurdên Kurdistana Rojava.

Hinek welatên din jî dest bi komkirina alîkariyê bo xelkê Sûriyê, ku ji ber rewşa Sûriyê neçar mane mal û warên xwe biterikînin, kirine.

AKnews