Di demekê de ku bajar û navçeyên kurdan li bakurê Sûriyê azadiya xwe radigihînin, taxa kurdan li paytexta Şamê Riknidîn ji duh de bi balafiran tê bombebarankirin.

Li gor nûçeya ajansa Rojavayê Kurdistanê Mîdyanewsê, Rojnameger Şiyar Xelîl ku bi xwe kurdekî Sûriyê ye û nişteciyê taxa Riknedîn e, got, “Ji duhî bi êvarê de, hinek dever li taxa kurdan li Riknedîn ku tên texmînkirin ew şaneyên Artêşa Azad in hatin bombebarankirin û di encamê de endamekî Artêşa Azad canê xwe ji dest da û çendên din jî birîndar bûn.”

Xelîl got ku ji vê sibê de, dîsa taxa Riknedîn kete bin bombebaranê lê vê carê bi şêweyekî korkî û gelek malên welatiyan ketin ber bombeyan.

Herwiha Xelîl da zanîn, “Ji ber bombebarana korkî welatiyan ku piraniya wan kurd in, malên xwe bi cih hiştin û koçber bûn. Beşek ji wan berê xwe dan taxa kurdan Zorava û beşê din jî berê xwe dan herêmên kurdî li bakurê Sûriyê.”

Ragihêner Şiyar Xelîl aşkera kir “Xelkê taxa Zorava bi dilekî berfireh pêşwaziya biryên xwe yên ji taxa Riknedîn dikin û mala xwe bi wan re parve dikin, li aliyê din otobûs li hinek cihan rawestiyan e û çaverêyî hatine daniştiyê taxa Riknedîn dikin taku berê wan bidin herêmên kurdan yên aram.”

Xelîl got ku bombebaran beriya 2 saetan rawestiyan lê biserdegirtina malan ji aliyê hêzên ewlehiya rejîmê ve dest pê kir.

Taxên kurdan li Şamê ji destpêka şoreşa Sûriyê de roleke aktîv û kara lîstine û li taxa Riknedîn çend xort di xwepêşandanan de bi destê hêzên rejîma Sûriyê hatine kuştin.

AKnews