Serokomarê Iraqê di nameyeke sersaxiyê de ji bo xwişka Beşar Esed, xemgîniya xwe ya kûr ji bo kuştina hevjînê wê Asif Şewket nîşan dide.

Beşê erebî yê malpera PUKmedia ya YNKê, nameya sersaxiyê ya Celal Talebanî ji bo xwişka Beşar Esed, Buşra Esed belav kir ku tê de Talebanî xem û dilgiraniya xwe ya kûr ji kuştina Asif Şewket nîşan dide û xwe wek beşdar û hevxemê wê dibîne.

Talebanî di nameya sersaxiyê de wek serokomarê Iraqê, bi germî sersaxiya Buşra û malbata wê dike û dibêje: “Sersaxiya we û malbata we ya birêz dikim..hêvîdar im ji xwedayê mezin ku sebr û aramiyê bide we û rehmetî (Asif) bi dilovaniya xwe ya berfireh û buhiştê şa bike, ewlekarî û aştiyê bide Sûriyê û gelê wê.”

Ev nameya sersaxiyê tenê di beşê erebî yê PUKmedia de hatiye belavkirin û beşê kurdî yê wê malperê û medyaya din a li ser YNKê ew nûçe belav nekirine.

Duh, teqîneke xurt baregeha ewlekariya neteweyî ya Sûriyê li Şamê hejand û di encama wê de wezîrê bergiriya Sûriyê Dawûd Ebdulla Racihe, cîgirê wezîrê bergiriyê û mêrê Buşra Esed Asif Şewket û serokê şaneya birêvebirina krîzê Hesen Turkmenî hatin kuştin.

Nameya sersaxiyê ya Talebanî di demekê de ye ku wezîrên derve yên Emerîka, Brîtaniya û Fransa bi awayekî sergirtî pêşwaziya kuştin û birîndarbûna berpirsên mezin ên Sûriyê kirin.

Rudaw