Biratîya Neynewa Kombûna Kabîneya Malikî li Mûsilê Baykot Dike
Derman Xetarî peyvdarê lîsta Biratîya Neynewa di evê bareyê de, bêjedanek da PNA û tekezî kir, ku encûmena wezîran a Iraqê dê sibê kombûneke xwe li Mûsilê saz bike û li hember evê pêngava kabîneya Malikî, ew jî wek lîsta Biratîya Neynewa dê kombûnê baykot bikin.
Derman Xetarî di evê bareyê de ragihand:´´ hatina Malikî bo parêzgeha Mûsilê, bo anîna fitne û dirustkirina ajawe di navbera pêkhatên Mûsilê de ye, çimku Malikî bo xizmeta bajar nahê û bo zêdekirina alozîyan dihê. Hatina wî jî tenê bo mebesta siyasî û dirustkirina arîşeyan li ewan deverane ye.´´
Xetarî weha jî got:´´ lîsta me ji dûbarebûna arîşeyên pêşmerge û asayiş û nakokîyên rêvebirêtîya parêzgehê dilgirane, çimku beşek ji alîyên siyasî arîşe li gel Kurd hene û hatina Malikî jî arîşeyan kûrtir û dijwartir dike.´´
Peyvdarê lîsta Biratîya Neynewa herwisa ragihand, ku ´´renge Malikî alîyên siyasîyên Mûsil han bide da ku li dijî hêza pêşmerge û hêzên asayişê kar bikin, ji ber ewê çendê jî em bi hîç awayekê pêşwazî li hatina Malikî bo Mûsilê nakin û dê kombûna encûmena wezîran û encûmena parêzgehê baykot bikin.´´
Xetarî di bêjedana xwe de got, ku ´´ gerek Malikî projeyên xizmetguzarî bo parêzgehan bianîba, nek kombûna encûmena wezîran bi mebestên siyasî. Em wek lîsata Biratîya Neynewa baykota evê kombûnê dikin û daxwaz ji Malikî jî dikin ku xizmeta Neynewa (Mûsil) bike ku ew çend salin hîç xizmetguzarîyên pêywsît bo nehatine pêşkêşkirin´´
Peyvdarê Biratîya Neynewa tekezî jî kir, ku kombûna pêştir a kabîneya Nûrî Malikî li Kerkûkê bi armanceke siyasî bû û ji bo dijatîkirina herêma Kurdistanê û kurd bû. Xetarî got, ku kombûna sibê ya li Mûsilê jî bi heman mebestên siyasî bi gîyaneke şovenîstî dihête sazkirin.
Roja 8 a evê heyvê Nûrî Malikî piştî alozbûna peywendîya navbera Hewlêr û Bexdadê, kombûna kabîneya hukûmeta xwe li Kerkûkê saz kir, ku ji alîyê wezîrên Kurd ve hate baykotkirin û piranîya siyasetmedarên Kurdistanî jî serdana wî bo kerkûkê bi dijatîkirina Kurd wesif kirin.
