Îro Sekreterê giştî yê Yekîtiya Nîştimaniya Kurdistanê û Serokkomarê Îraqê Celal Talebanî li Silimaniyeyê pêşwaziya Serokê Kurdistanê û Serokê partiya demokrata Kurdistanê birêz Mesûd Barzanî û Cîgirê Serokê PDKê û Berbijarê postê Serokwezîriya Kurdistanê birêz Nêçîrvan Barzanî kir.

Di hevdîtineke dostane de ku, Cîgirê Sekreterê giştî yê YNK Dr. Berhem Salih jî tê de amade bû Serok Mam Celal bi germî pêşwazî û bixêr hatina Serok Barzanî û Nêçîrvan Barzanî kir û pişt re jî her dû alî nêrîn û ramanên xwe yên di derbarê pêşkeftinên siyasî yên li Kurdistan û Deverê de anîn ziman û nêrînên her dû aliyan jî li ser piraniya mêjar û meseleyan weke yek bûn.

Di beşeke din ya vê hevdîtina han de her dû Serok tekez li ser girîngiya bihêztir kirina peymana steratejîk ya di navbera partiya demokrata Kurdistanê û Yekîtiya nîştimaniya Kurdistanê de kirin û ev yek jî diyar kirin ku, dibe her dû alî bi hevre di her warê de kar kirineke hevbeş û hevpar bihêztir bikin.

Di dirêjahiya vê hevdîtina han de meseleya damezrandina Hikûmeta nû ya Kurdistanê jî hate gotûbêj kirin û her dû alî diyar kirin ku, bi mebesta awedan kirina Kurdistanê û xizmet kirineke baştir ji welatiyên Kurdistanê re pêwîste Hikûmeta nû ji kadroyên jêhatî û bihêz were damezrandin.

Di hevdîtina han de meseleya peyvendiyên heyî yên di navbera aliyên siyasî yên Kurdistanê de jî hatin nîqaşkirin û her dû alî tekez li ser vê yekê kirin ku, pêwîste peyvendiyên han hîn bihêztir bibin û peyvendiyên heyî yên bi aliyên opozisyonê re jî dibe baştir û serdemiyanetir bibin daku, em bikaribin xizmeta yek xistina nav mala Kurd bikin.