Rêveberê nahyeya Batîfa ya ser bi qeza Zaxo aşkera kir, şeva borî ji ber hebûna PKKê balefirên şer ên Tirkiyê gelek gundên sînorê nahyeyê bombebaran kirin û rûniştvanên gundeke din jî mijûlin ku gund vala bikin.

Rêveberê nahyeya Batîfa ya ser bi qeza Zaxo Dilşêr Ebdulstar îro 11.11.2020ê ji Basnewsê re ragehand: ‘’Şeva borî ji ber hebûna çekdarên PKKê, sînorê gelek gundên nahyeya Batîfa, Kanîmasî û Dergarê ji aliyê balefirên şer ên Tirkiyê ve hatin bombebaran kirin û rûniştvanê gundê Banka jî mal û cîhên jiyana xwe bicîh hiştin.’’

Herwaha got: ‘’Berî çend mehan 4 gundên bi navên Geşanî, Pîrbile, Eblehî û Minînê yên ser bi nahyeyê ji ber hebûna binke û baregehên PKKê ji aliyê Tirkiyê ve hatin bombebaran kirin û hatin vala kirin.’’

Dilşêr Ebdulstar got: ‘’Naha rûniştvanên gundê Banka ya ser bi nahyeya Batîfa di bin metirsiyeke zêde de ne û gund vala kirin û tenû çend mal mane.’’

Rêveberê nahyeya Batîfa got: ‘’Berê û salên borî ji ber hebûna PKKê û bombebaranên artêşa Tirkiyê li sînorê nahyeyê 27 gund hatibûn vala kirin û naha hejmara gundên hatine vala kirin geheştiye 29 gundan.’’

Basnews