Serokê Herêma Kurdistanê, Nêçîrvan Barzanî êrîşa terorîstî ya li bajarê Nice yê li Fransa şermezar kir û hevxemiya xwe bo xelk û hikûmeta Fransayê û malbatên qurbaniyan nîşan da.

Nêçîrvan Barzanî îro Înê li ser hesabê xwe yê twîterê amaje bi êrîşa roja bihorî ya li Dêra Notredam li bajarê Nice yê Fransayê dike û êrîşê şermezar dike û dibêje, di vê dema zehmet de hevsoz û hevxemê gel û hikûmeta Fransayê me.

Serokê Herêma Kurdistanê: “Ez vê êrîşa terorîstî şermezar dikim ku li bajarê Nice li Fransayê, hejmarek welatî kire armanc û bûne qurbanî.”

Wezîrê Navxwe yê Fransayê, Gerald Darmanin di daxuyaniyekê de ragihandiye: “Em di şerekî li dijî dijmin de ne, li navxwe û derveyî welat”. Darmanin herwiha got, ew pêşbînî dikin êrîşên din li dijî Fransayê bêne kirin.

Serokê Fransayê Emmanuel Macron jî duh li cihê êrîşê amade bû û di daxuyaniyekê de ragihand, Fransa rastî “êrîşa terorîstî ya îslamî” bûye û diyar kir, “em teslîm nabin û dest ji nirxên xwe bernadin”.

Her di wê gotara xwe de Emmanuel Macron rewşa neasayî li tevahiya Fransayê ragihand û got, “Artêşa Fransayê di parastina dibistan û cihên olî de beşdar dibe. Em dê welatinên Komara Fransayê biparêzin. Divê welatiyên Fransayê çav vekirî bin û rê nedin tundrewan duberekiyê çêbikin.

Li bajarê Nice yê Fransayê , duh Pêncşemê 29ê Cotmeha 2020an, di êrişeke bi kêran de 3 kes hatin kuştin û çend kesên din jî birîndar bûn. Şaredarê wî bajarî jî ew wek “êrişeke terorîstî” bi nav kir.

Li gor ajansa France Press, kesê êrîşkar xelkê Tunisê ye û di vê mehê de gihîştiye Fransayê.

Serokê Amerîkayê Donald Trump jî di twittekê de piştevaniya xwe bo Fransayê ragihandiye û tekez kiriye ku divê “êrişên îslamî yên radîkal ên terorîstî bên rawestandin.”

Rudaw