Wezareta Navxwe ya Tirkiyê dibêje di encama şer û pevçûnan de li Agirî û Amedê, 6 gerîlayên PKKê canê xwe ji dest dane. HPGê jî berî 2 rojan kuştina 11 serbazên Tirkiyê li Heftenîn û Xakurkê ragihandibû û nasnameya 5 gerîlayên canê xwe ji dest dane aşkere kiribû.

Wezareta Navxwe ya Tirkiyê derbar operasyon û şer û pevçûnên li gel gerîlayên PKKê daxuyaniyek da.

Li gor daxuyaniya hatiye bêlavkirin, serbazên Tirkiyê di çarçoveya operasyona `Birûsk 3` de, li navçeya Bazîdê ya ser bi parêzgeha Agiriyê ve, bi piştevaniya hêzên azmanî operasyonek pêkanîne.

Wezareta Navxwe ya Tirkiyê dibêje, di encama wê operasyon û êrişa hêzên wan de 3 gerîlayên PKK canê xwe ji dest dane.

Her li gor daxuyaniya Wezareta Navxwe li navçeya Lice ya Amedê jî di operasyona`Birûsk-7` ya hêzên wan de şer li gel PKKê rû dane û di encamê de 3 gerîlayên PKKê canê xwe ji dest dane û hatiye ragihandin ku operasyona wan berdewam dike.

Lê heta niha, ji aliyê PKK ve derbarê şer û pevçûnên li wê navçeyê daxuyaniyek nehatiye dayîn û ev zanyariyên Tirkiyê nehatine piştrastkirin.

Li aliyê din navenda ragihandina Hêzên Parastina Gel (HPG) ku baskê leşkerî yê PKK ye, roja 2 Cotmehê, ragihandibû, hêzên wan, di 24 Îlonê û 1 Cotmehê 2020an de, li Heftenînê û Xakûrkê li dijî artêşa Tirkiyê êrîş pêkanîne.

Li gor daxuyaniya HPGê di encama wan êrişan de herî kêm 11 leşkerên Tirkiyê hatine kuştin.

Herwiha HPGê, di 3 Cotmehê de jî, nasnameya 5 gelîlayên xwe yên ku di 8 û 9 Tebaxa borî de, li Heftenînê di encama bombebarana artêşa Tirkiyê de canê xwe jidest dane jî aşkere kiribû.

Rudaw