Arîn Mesrûr Barzanî ji ber xebatên wî yên di warê serkirdetî, geşepêdana şiyanên ciwanan û parastina jîngehê de, "Xelata Rêzgirtinê ya Cîhanî" (Global Recognition Award) ya sala 2026an wergirt.

Arîn Mesrûr Barzanî bi rêya dezgeha "Kurdistan Foundation", karên xwe li ser pêşxistina şiyanên ciwanan, afirandina derfetên kar û perwerdeyên pîşeyî ava kirine. Li gorî amarên dezgehê, xebatên wan encamên berçav bi dest xistine:

- Alîkarî bi 25 hezar xwebexşan re hatiye kirin.

- Zêdetirî 29 hezar kes di xulên perwerdeyê de hatine şopandin.

- Ji bo 35 hezar ciwanan derfetên kar hatine peydakirin.

- Zêdetirî 41 hezar saetan xizmetguzariya giştî hatiye pêşkêşkirin.

Projeyên sereke û xizmetguzarî

Yek ji projeyên herî mezin ên dezgehê "Navenda Ciwanan" e, ku wek mezintirîn navenda ciwanan li ser asta Kurdistan û Iraqê tê naskirin. Ev navend ji bo ciwanan bûye qadeke giring a fêrbûn, guftûgo û hevahengiyê.

Di warê jîngehê de, kampanyaya "Climate.KRD 100 Schools" hatiye destpêkirin. Di vê projeyê de mijarên guherîna keşûhewayê û parastina xwezayê bi awayekî zanistî fêrî xwendekar û mamosteyan tê kirin.

Herwiha, Arîn Barzanî piştevaniya projeya "Kurdish Text-to-Speech" kir ku projeyekî teknolojîk e ji bo xwendina nivîsan bi zimanê kurdî. Ev proje bi taybetî xizmetê ji bo wan kesên ku pirsgirêka dîtinê (nabîna) hene dike, da ku bikaribin bêyî cudahî di nava civakê û jiyana demokratîk de cih bigirin.

Nirxandina komîteya xelatê

Biryara xelatkirina Arîn Barzanî ji aliyê komîteyeke pispor a navdewletî ve hatiye dayîn. Di nirxandinê de modela zanistî ya "Rasch" hatiye bikaranîn û di warên serkirdetî, nûgerî, parastina jîngehê û bandora civakî de asta "nayab" wergirtiye.

Berdevkê Rêxistina Xelata Cîhanî (Global Recognition Award), Alex Sterling, derbarê xelatê de got: "Arîn Mesrûr Barzanî hêjayî vê xelatê ye, ji ber ku wî kariye dîtineke zelal û xizmetguzariyeke pratîk bigihîne hev. Wî sîstemek ava kiriye ku ciwan û pêkhateyên qels di avakirina pêşeroja Herêma Kurdistanê de bibin xwedî rol."

Sterling herwiha destnîşan kir ku xebatên Arîn Barzanî rê li ber berpirsyariya hevbeş vedike û piştgiriyê dide civakan daku bigihîjin pêdiviyên xwe yên bingehîn.

 

Rudaw