Petrola Kerkûkê dê bi rêya boriyên Herêma Kurdistanê were hinartin
Şirketa Petrola Bakur ragihand ku wan hemû amadehiyên xwe yên teknîk û endazyariyê ji bo destpêkirina wergirtin û hinartina petrola xav a Kerkûkê temam kirine.
Ev petrol dê bi rêya xeta stratejîk a boriya petrolê ya Herêma Kurdistanê ber bi Bendera Ceyhanê ya Tirkiyeyê ve were hinartin.
Berdevkê Wezareta Petrolê ya Îraqê jî dibêje, hinartina ducare li gorî wê peymanê ye ku li gel Herêma Kurdistanê kirine.
Şirketa Petrola Bakur doh di daxuyaniyekê de eşkere kir ku pêgehên teknîk û endazyariyê hemû karên xwe li gorî planan kirine.
Li gorî daxuyaniyê, niha amadehiyên ji bo karkirina sîstemê bi dawî bûne.
Biryar e destpêkê boriya 40 înçî were tijîkirin da ku petrol bigihêje stasyona IT1Ayê.
Pişt re dê bi rêya boriya 46 înçî û bi hevahengiya li gel aliyên pêwendîdar, pêvajoya ceribandina karkirina temam were kirin.
Li gorî daxuyaniyê, stasyona IT1Ayê niha amade ye ku rojane 300 heta 350 hezar bermîlî petrola xav wergire û hinarde bike.
Ev jî di çarçoveya amadehiyan de ye ji bo destpêkirina hinartina petrolê ya bi rêya sîstema bakur.
Şirketa Petrola Bakur diyar kir ku ev pêngav beşek ji hewldanên Wezareta Petrolê ye ji bo nûjenkirina sîstema hinartinê ya bakur û bihêzkirina şiyanên karkirinê.
Her wiha ji şirket û aliyên piştgir xwestiye ku pêbendiyên xwe yên peymanê temam bikin da ku li gorî xişteyên diyarkirî dest bi karan were kirin.
Peymana Hewlêr û Bexdayê
Berdevkê Wezareta Petrolê ya Îraqê Selîm Rûkabî ji Rûdawê re ragihand:
"Bi rêya boriyên Herêma Kurdistanê dê ducare dest bi hinartina petrola qadên Kerkûkê ya ji bo Bendera Ceyhanê ya Tirkiyeyê were kirin.
Ev jî li gorî wê peymana di navbera Îraq û Herêma Kurdistanê de ye û lihevtêgihîştin hatiye îmzekirin."
Berdevkê Wezareta Petrolê ya Îraqê li pey çû:
"Boriyên Îraqê yên ku rasterast petrolê vediguhêzin Bendera Ceyhanê kevn bûne.
Piştî sala 2014an karên wan sekinîne û borî heta niha jî di qonaxa nûjenkirinê de ne."
Şiyana hilberîn û veguhastinê
Şirketa Petrola Bakur rojane nêzîkî 325 hezar bermîlî petrola xav li qadên parêzgeha Kerkûkê û navçeyên derdora wê hildiberîne.
Beşeke zêde ya vê petrolê ji bo pêdiviyên navxwe û parzûngehan tê bikaranîn.
Şiyana karkirinê ya stasyona IT1Ayê rojane 300 heta 350 hezar bermîlî ye.
Ev jî tê wê wateyê ku gava xet bi temamî bikeve kar, dikare piraniya petrola qadên Kerkûkê veguhêze.
Rudaw
