Berbanga îro bi dronê êrişî ser baregeha Çemşarê ya Partiya Azadiya Kurdistanê (PAK) a li nêzîkî Kampa Darêşekranê hat kirin.

Berpirsekî partiyê ragihand ku di êrişê de 8 Pêşmergeyên wan birîndar bûn.

Endamê Serkirdayetiya Partiya Azadiya Kurdistanê (PAK) Edîb Xalidiyan ji Rûdawê re ragihand:

"Êriş demjimêr 02:00yê berbanga sibehê qewimî. Di encamê de 8 Pêşmergeyên me yên ji Supaya Milî ya Kurdistanê birîndar bûn."

Edîb Xalidiyan li ser rewşa tenduristiyê ya birîndaran got, "Birîna çar Pêşmergeyan giran e."

Baregehên PAKyê her tim tên çavdêrikirin

Ev hêza Rojhilatê Kurdistanê heta niha gelek caran ji aliyê hêzên Komara Îslamî ya Îranê ve hatiye bombebaran kirin.

Di êrişên berê de du Pêşmergeyên wan şehîd ketibûn û 26 Pêşmergeyên wan jî birîndar bûbûn.

Edîb Xalidiyan diyar kir ku dronên sîxuriyê her tim li ser baregehên wan difirin û got:

"Her tim dronên çavdêriyê li ser baregehên me difirin û agahiyan kom dikin."

Zêdetirî 900 dron û mûşek hatine avêtin

Ji destpêka şerê navbera Amerîka û Îsraîlê li gel Îranê yê ji 28ê Sibatê ve heta îro 19ê Tîrmehê, li Herêma Kurdistanê bi nêzîkî 920 dron û mûşekan êriş hatine kirin.

Di encama van êrişan de 30 kes şehîd ketin û 148 kes jî birîndar bûn.

Ji wan birîndaran 82 kes Pêşmergeyên partiyên Rojhilatê Kurdistanê ne.

 

 

Rudaw