Li ser rêya sereke ya Dukan – Ranye ya Silêmaniyê, rûdaneke trafîkê qewimî û çar endamên malbatekê di nav otomobîlê de şewitîn. Polîsê Silêmaniyê nasname û zanyariyên derbarê wan de eşkere kir.

Duh înê 28ê Tebaxa 2020an, li ser rêya sereke ya Dukan – Ranye, di navbera sê otomobîlan de rûdaneke trafîkê qewimî û di encamê de çar endamên malbatekê jiyana xwe ji dest dan, ku hemû di nav otomobîlekê de bûn.

Rêveberiya Polîsê Silêmaniyê eşkere kir; lêkolînên wan dest pê kirine û karîne nasname û kesûkarên qurbaniyan bibînin.

Polîsê Silêmaniyê amaje bi wê yekê kir; ji ber ku otomobîl û hemû welatiyên tê de bi temamî şewitîbûn, termên wan nedihatin nasîn. Piştî rûdanê hêzên Polîsê Parêzgeha Silêmaniyê Beşa Polîsê Dukanê dest bi lêkolînan kir û kesûkarên qurbaniyan dîtin.

Li gor zanyariyên destpêkê, endamên malbata ku di rûdana trafîkê de jiyana xwe ji dest dan, nişteciyên taxa Serçinar a bajarê Silêmaniyê ne, lê li gor nasnameya wan ji xelkê navçeya Şêxan a li sînorê Şingalê ne.

Hat ragihandin ku çar qurbaniyên rûdanê; jin û mêr û du zarokên wan bûn.

Rudaw