Serok Mesûd Barzanî bi boneya 32yemîn salvegera enfalkirina xelkê devera Badînan ji aliyê rejîma Be's ve, peyamek belav kir.

Peyama Serok Mesûd Barzanî wiha ye:

Bi navê Xwedayê mezin û dilovan

Tawana Enfala Badînan berdewamiya wan zincîre tawan û karesatan bû ku rejîma berê yê Iraqê bi mebesta qirkirin û jinavbirina gelê Kurdistanê di salên heştiyên sedsala bîstem de li navçeyên cûda cûdayên Kurdistanê encam da. Ji 25ê Tebaxa 1988an heta 6ê Îlona 1988an, beşeke zêde ya navçe û gundên devera Badînan ketin ber helmeta nemirovane ya kîmyabarankirin û girtin û kuştin û veguhestin û enfala welatiyên bê tawan ji aliyê hêzên rejîma wê demê ya Iraqê ve. Bi hezaran kes şehîd û bêserûşûn û koçber kirin û bi sedan gund jî rûxandin.

Mezintirîn kêşeya rejîmên berê û neyarên Kurdistanê, hebûna gelek bû ku xwediyê dîrok û cografya û taybetmendiyên neteweyî bû. Mebesta wan ew bû li rêya zorê û jenosayd û enfal û guherîna demografya ve dawiyê bi hebûna gelê Kurdistanê bînin. Lê belê xweragiriya xelkê Kurdistanê rêya wê yekê girt ku ew plana şûm û nemirovane ser bigrê.

Em di bîranîna karesata Enfala Badînan de tekez li ser rewatiya maf û daxwazên gelê xwe dikin û pêwîst e jî dewleta Iraqê qerebûya wan hemû tawan û karesatan bike ku di sedsala derbasbûyî de li ser gelê Kurdistanê de aniye.

Di vê bîranîna tehl de silav ji bo giyanê pak ê şehîdên Enfala Badînan û Germiyan û Barzan û hemû şehîdên rêya azadiya Kurdistanê re dişînîn û em radigihînin ku tu demekê em wê zulm û êş û tawanan ji bîr nakin ku li dijî gelê me hatine kirin.

Mesûd Barzanî

25 Tebax 2020

K24