Hat zanîn ku Hevserokê Giştî yê Berê yê HDPyê Selahattîn Demîrtaş serdana Kemal Kiliçdaroglu red kiriye.

Hat diyarkirin ku Selahattîn Demîrtaş naxwaze Kemal Kiliçdaroglu li Girtîgeha Tîpa F ya Edîrneyê serdana wî bike û li vê serdanê erênî nanêre.

Hat zanîn ku Demîrtaş bi rêya parêzerên xwe ragihandiye ku ew dê serdana Kiliçdaroglu qebûl neke.

Kiliçdaroglu çi gotibû?

Necdet Saraçê ku di tîma xebatê ya Kemal Kiliçdaroglu de ye berê daxuyaniyek dabû.

Saraç ragihandibû ku dê Kiliçdaroglu li girtîgehê serdana Selahattîn Demîrtaş bike.

Ev daxuyaniya Saraç piştî axaftineke Kiliçdaroglu hatibû.

Kiliçdaroglu di bernameyeke televîzyonê de li ser rakirina parêzbendiya Demîrtaş hinek nirxandin kiribûn.

Di wê weşanê de ji Kiliçdaroglu hatibû pirsîn, "Ma hûn ji rakirina parêzbendiya Demîrtaş û şandina wî ya girtîgehê poşman in?"

Kiliçdaroglu jî li ser vê pirsê bersiva "Na" dabû.

Van gotinên Kemal Kiliçdaroglu rastî bertekan hatibûn.

Di serî de DEM Partî gelek aliyan bertek nîşanî van gotinên Kiliçdaroglu dabûn.