Navenda Çavdêriya Azadiya Ayînî ya Amerîkayê daxwaz ji Tirkiyê dike jiyana hemwelatiyekî Krîstiyanê xelkê Efrînê rizgar bike ku ji aliyê çekdarên ser bi wî welatî ve li bi tohmeta “dest ji ola xwe berdaye” hatiye girtin.

Navê wî welatiyê Efrînê Ridwan Mihemed e û li gor Rêxisitina Mafê Mirovan a Efrînê, ev demek e Ridwan û Cennet a hevjîna wî, ola xwe ji Îslamê kirine Krîstiyan.

Li gor tiwîteke Komîsyona Navdewletî ya Amerîkayê ya taybet bi azadiya olî, jiyana Ridwan di metirsiyê de ye û ji aliyê çekdarên girêdayî Tirkiyê ve bi tohmeta guhertina ola xwe hatiye girtin.

Ew navenda Amerîkî daxwaz ji Tirkiyê dike destwerdanê bike û ji çekdarên hevpeymanên xwe bixwaze ku Ridwan rizgar bikin û dest ji wan kiryaran jî berdin.

Cenneta hevjîna wî hemwelatî jî di dawiyaTîrmeha derbasbûyî de de jiyana xwe ji dest dabû, lê çekdaran nehişte Ridwan hevjîna xwe veşêre û jêre gotibûn ew “kafir e”.

Ridwan Mihemed 30ê Tîrmehê bi tohmeta guhertina ola xwe ji aliyê grûpên çekdar ve hatibû girtin û ji wê demê ve ti zanyariyek derbarê wî de nehatiye bidestxistin.

Li gor zanyariyan qeşe Nîhad Hesen ku xelkê Efrînê ye û niha li kenîseyeke Lubnanê ye, Ridwan Mihemed li binkeyeke grûpa Feyleq el Şam li Efrînê girtiye û ew dibêje, “egera wê heye bê darvekirin.”

Grûpên çekdar ên ser bi Tirkiyê ve sala 2018an dest bi ser Efrînê de girtibûn û ji wê demê ve li gor raportên navdewletî hejmareke zêde ya binpêkirina mafên mirov ji aliyên wan grûpên çekdar ve hatine encamdan û herwiha hejmareke hemwelatiyan ji aliyê wan grûpan ve bi tohmetên cuda hatine girtin, revandin û kuştin.

Rudaw