Daxwaz ji hikûmeta Îraqê tê kirin têkiliyên xwe li gel Tirkiyeyê qut bike
Derbarê mijara êrîş û operasiyonên Tirkiyeyê de yên li deverê sînorî û herwiha bûyera bordiman kirina hêzên zirêvanên sînor yên Îraqê ji aliyê Tirkiyeyê ve, parlementerên Îraqî daxwaz ji hikûmetê dikin helwesteke dijwar û tund raberî Tirkiyeyê bike.
Parlementer Mensûr Beîcî daxwaz ji hikûmeta Îraqê kiriye daku li hember êrîş û operasiyonên Tirkiyeyê bêdeng nebe û helwesteke tund raber bike.
Beîcî herwiha gotiye: Lazime balyozê Tirkiyeyê yê li Bexdayê were derxistin û hikûmeta Îraqê tevahiya têkiliyên xwe bi taybetî têkiliyên abûrî û bazirganî yên li gel Tirkiyeyê qut bike jiber ku ew yek baştirîn bersife bo destwerdanên Tirkiyeyê.
Weke tê zanîn beriya du rojan artêşa Tirkiyeyê civîneke hevbeş ya pkk û zirêvanên sînor yên Îraqê bordiman kiribû û di encam de 2 Fermandarên Îraqî li gel du gerîlayên PKKê canê xwe ji dest dabûn.
