Mekteba siyasî ya Partîya Demokrata Kurdistanê (PDK) bi bone ya 11mîn salvegera damezirandina Bizava Gorranê, peyamek arasteya wê bizavê kir û radigehîne, rola Bizava we di evê qonaxa dijwar de, bo mukimkirina akincî û bihêzkirina qewareya sîyasî û destûrîya Herêmê û dezgehên rewayî yên wê û binemayên azadîyê nîşaneya dilsozîya we ye.

Deqa peyama pîrozbahîya Mekteba Sîyasî ya PDKyê:

Birêzan/ rêkxerê giştî û endamên civata giştî û nîştîmanîya Bizava Gorranê

Bi bone ya 11mîn salvergara damezirandina Bizava hewe ya têkoşer gerimtirîn pîrozbahîya xebat û milnedanê li hewe, endam û alîgirên hewe dikin.

Rola bizava hewe di evê qonaxa dijwar de, bo mukimkirina akincîyê û bihêzkirina qewareya sîyasî û destûrîya Herêmê û dezgehên rewayî yên wê û binemayên azadî û demokrasîyê nîşaneya dilsozîya hewe ye bo bidestvehînana mafên me yên hevpişk ku ev jî cihê şanazîyê ye.

Em di demekê de ku evê bîranîna hewe pîroz dikin, rewşa Herêma Kurdistanê û deverê bi qonaxeka giring û hestyar de derbaz dibe, bi awayekê kirîzeka abûrî û tenduristîyê seranserî cîhanê vegirtîye, em zêdetir tekezê li ser hev xebatî û yekrêzîyê û tevayîyê dikin bo rûbirûbûna wan qeboyan û paraztina destkevtan û rewşa akinicîya Herêma Kurdistanê û bi dest vehînana armancên nîştîmanî û neteweyîyên me.

Hêvîdarin bi hemû alîyan ve hewil bidin evê hevpeyamanîyê û hevahengîya di navbera me de, zêdtir mukim û bihêztir bikin û milbimilên partî û alîyên sîyasîyên din yên Kurdistanî kar bikin bo nehêlana astengên pêşîya çareserkirina pirsgirêk û arîşeyan û dabînkirina ayîndeyeka ronahîtir û geştir bo gelê me.

Careka dî pîrozbahîyê li hew dikin û her serfiraz û serkevtî bin…



Mekteba Sîyasî

Partîya Demokrata Kurdistanê
25/7/2020