Berpirsê Pêwendiyan ê Komeleya Zehmetkêşan a Kurdistanê ragihand, yek ji sê Pêşmergeyên ku îro di êrişa bi dronan a li ser Kampa Sûrdaşê de birîndar bibûn, ji ber giraniya birîna xwe şehîd ket.

Berpirsê Pêwendiyan ê Komeleya Zehmetkêşan a Kurdistanê yê Hewlêrê Emced Husên Penahî li ser mijarê ji Rûdawê re axivî.

Emced Husên Penahî got, "Kêliyek berê yek ji Pêşmergeyên me yên birîndar a bi navê Xezal Mewlan ji ber giraniya birîna xwe şehîd ket."

Rewşa du birîndarên din baş e

Emced Husên Penahî li ser rewşa birîndarên din ên heman êrişê got:

"Du birîndarên me yên din mane û rewşa tenduristiya wan cîgir e."

Sekreteriya Komîteya Navendî ya Komeleya Zehmetkêşan a Kurdistanê jî îşev daxuyaniyek belav kir û tê de got:

"Hevala me Xezal Mewlan Çeperabad, Pêşmergeya Komeleyê, şehîd ket.

Hevala me Xezal a ku îro ji ber êrişa bi dronan a Komara Îslamî birîndar bibû, piştî ku gihîşt nexweşxaneyê, ji ber giraniya birîna xwe canê xwe ji dest da û tevlî karwanê şehîdên Komele û Kurdistanê bû."

"Dilekî tijî hêvî sekinî"

Xezal Mewlan ji bajarê Mehabadê ye.

Komeleya Zehmetkêşan a Kurdistanê diyar kir, "Wê wekî bi hezaran keçên şoreşger ên Kurdistanê, ji bo têkoşîn û xebata li dijî her cure cudakariyê refên Komeleyê hilbijart.

Îro dilekî tijî hêvî bi destê sûcdarên Komara Îslamî ya Îranê sekinî lê bêguman moral û vîna keç û xortên Kurdistanê ya ji bo azadî û serxwebûnê didome."

Di daxuyaniyê de her wiha hat gotin "Ev êrişa terorîstî, delîleke din a pîşeya dijmirovahî û dijazadî ya Komara Îslamî ya Îranê ye; rejîmeke ku ji bo parastina desthilata xwe, ji bo kuştin û çewisandina xelkê têkoşer ti sînoran nas nake.

Em sersaxiyê li malbata hevala xwe Xezal, hemû hevalên wê û xelkê têkoşer ê Kurdistanê dikin."

Ev di demekê de ye ku piştî nîvroya îro droneke bombebarkirî kampa li Sûrdaşê ya li parêzgeha Silêmaniyê kiribû hedef ku ew der cihê niştecihbûna Pêşmerge û malbatên Komeleya Zehmetkêşan a Kurdistanê ye.

Di heman rojê de li Koyê û Xelîfanê jî êriş hatin kirin

Her îro Endamê Desteya Rêveber û Berpirsê Navenda Pêşmergeyên Partiya Demokrat a Kurdistana Îranê (PDKÎ) Kawa Behramî ji Rûdawê re ragihand: "Îro êvarî bi dronekê êrişî Kampa Azadiyê ya li Koyê hat kirin."

Serperiştyarê Îdareya Serbixwe ya Soranê Helgurd Şêx Necîb jî îro ji Tora Medyayî ya Rûdawê re got: "Îro du dron li sînorê qezaya Xelîfanê hatin xistin."

Dîjeterora Kurdistanê jî di daxuyaniyekê de belav kir, saet 17:04ê êvarî, du dronên bombekirî yên ku ji axa Îranê ve ber bi Hewlêrê ve hatibûn arastekirin, ji aliyê firokeyên şer ve hatin têkşikandin.

 

Rudaw