Îranê herî zêde êrişî kîjan welatî kiriye?
Îranê ji 28ê Sibatê ve herî zêde êrişî Mîrnişînên Ereb ên Yekbûyî (Îmarat) kiriye.
Êrişên Amerîka û Îsraîlê yên li ser Îranê ji 28ê Sibatê ve dest pê kiriye.
Îranê jî di êrişên xwe yên bersivdayînê de herî zêde mûşek û dron berdane Mîrnişînên Ereb ên Yekbûyî (Îmarat).
Li gorî amarên wezaretên parastinê yên welatên Kendavê, saziyên li Îranê, artêşa Îsraîlê û çavkaniyên îstixbaratî yên vekirî, hejmara êrişan diyar bû.
Îranê di êrişên xwe de nêzîkî 3 hezar û 186 mûşek û dronan avêtin welatên Kendavê.
Herî zêde Îmarat hat armanckirin
Cebilxaneyên Îranê di nav welatên Kendavê de herî zêde axa Îmaratê kiriye armanc.
Di navbera 28ê Sibatê û 11ê Adarê de hezar û 797 mûşek û dronên Îranê ber bi Îmaratê ve hatin avêtin.
Ev hejmar ji sedî 56ê êrişên Tehranê yên li ser welatên Kendavê pêk tîne.
Di rêza duyem de Kuweyt tê û Îranê 682 mûşek û dron avêtine wir.
Her wiha 285 mûşek û dron avêtine Behreynê, zêdetirî 237 mûşek û dronan avêtine Qeterê, zêdetirî 170 mûşek û dronan avêtine Erebistana Siûdî û zêdetirî 15an jî avêtine Umanê.
Li hêla din, Îranê di êrişan de bi zêdetirî 650 mûşek û dronan êrişî Îsraîlê kiriye.
Lê belê ne Îranê ne jî Îsraîlê amarên di destê xwe de bi temamî parve nekirin.
Pergalên parastinê yên welatên ku hatin armanckirin, piraniya van mûşek û dronan xistin xwarê lê hinek ji wan li armancên xwe ketin.
Hejmara êrişan a li gorî welatan ev e:
Îmarat: 1,797 mûşek û dron
Kuweyt: 682 mûşek û dron
Îsraîl: Herî kêm 650 mûşek û dron
Behreyn: Herî kêm 285 mûşek û dron
Qeter: Herî kêm 237 mûşek û dron
Erebistana Siûdî: Herî kêm 170 mûşek û dron
Uman: Herî kêm 15 mûşek û dron
Êrişên Amerîka û Îsraîlê yên li ser Îranê
Îsraîl û Amerîkayê 28ê Sibatê êrişeke leşkerî bir ser Îranê.
Îranê jî li hemberî vê yekê dest bi êrişên bersivdayînê kir.
Îranê ji bilî Îsraîlê, êrişî baregehên Amerîkayê yên li Qeter, Îmarat û Behreynê û hinek welatên din ên herêmê kir.
Di êrişên Amerîka û Îsraîlê de Rêberê Îranê Elî Xamineyî û gelek berpirsên pilebilind hatin kuştin.
Li gorî berpirsên Îranî, di êrişên Amerîka û Îsraîlê de hejmara kuştiyan ji hezar û 348an derbas bûye û hejmara birîndaran jî zêdetirî 17 hezaran e.
Rudaw
