Serokê Hikûmeta Herêma Kurdistanê Mesrûr Barzanî Nexweşxaneya "Majidî ya Taybet" ku yek ji mezintirîn û nûjentirîn projeyên tenduristiyê yên li ser asta Herêmê ye vekir.

Serokê Hikûmeta Herêma Kurdistanê Mesrûr Barzanî îro 3ê Adarê Nexweşxaneya Majidî ya Taybet li bajarê Hewlêrê vekir. Ev nexweşxane ku projeyeke stratejîk a "Kompanyaya Majidî" ye û ji veberhêner Ehmed Mela Qadir Majidî ve hatiye cîbicîkirin, bi sermayeya 80 mîlyon dolarî hatiye avakirin.

Serokê Hikûmeta Herêma Kurdistanê Mesrûr Barzanî di dema vekirina nexwaşxaneyê de gotarek pêşkeş kir û waha got:

Ez pîrozbahiyê li gelê Kurdistanê, bi taybetî li gelê Hewlêrê, dikim ji bo vekirina Nexweşxaneya Majidî, ku bi awayekî pir pêşketî, li gorî pîvanên navneteweyî hatiye çêkirin.

Ez destxweşiyê li Hacî Ehmed dikim ku wekî veberhênerek kariye vê nexweşxaneyê li vir ava bike û bikeve xizmeta gelê Kurdistanê û hemî kesên ku serdana Kurdistanê dikin bike.

Her wekî her car, ez hêvî dikim ku kes neçar nebe ku were nexweşxaneyê, lê heke kesek hewce be jî, bê guman niha ev nexweşxane di astek wusa pêşketî û bi awayekî pir, pir rêkûpêk de hatiye çêkirin ku dikare hewcedariyên gelê Kurd bicîh bîne.

Ez careke din pîrozbahiyê li Hacî Ehmed dikim û hêvî dikim ku hemî veberhênerên Kurd dê berdewam bikin ku li Kurdistanê û ji bo pêşkeftina Herêma Kurdistanê veberhênanê bikin. Her yek ji sektoran û her yek ji mijarên taybetî yên ku ew tê de dixebitin.

Tiştê ku min dîtiye nexweşxaneyek pir pêşketî ye, ku bi alavên pir pêşketî ve hatiye sazkirin. Ez piştrast im ku bijîşk, perestar û karmendên me yên pir baş hene ku dikarin xizmeta welatiyan bikin.

Careke din, ez pîrozbahiyê li her kesî dikim.

Bi vê boneyê, ez dixwazim behsa du-sê mijarên girîng bikim ku ez difikirim hûn hemî jê haydar in. Yek ji wan alozî û pevçûnên ku herêmê dorpêç kiriye ye. Mixabin herêma me ev êş kişandiye. Ya herî xirab ew e ku di çend rojên borî de, hin aliyên ji yasayê derketî û terorîstan êrîşî Hewlêrê dikin. Ez ji gelê Kurd re ji bo berxwedana wan spas dikim. Em ê hewl bidin ku Kurdistanê ji wî şer û krîza li herêmê dûr bixin û em ê berdewam bikin ku destkeftiyên xwe biparêzin. Ez ji gelê Kurd dixwazim ku rêbernameyan bişopînin û bi her awayî xwe biparêzin. Ez hêvî dikim ku ev pirsgirêk bi îzna Xwedê zû biqedin û ewlehî û aramî bikeve şûna şer, alozî û tundûtûjiyê bigire.

Ez ji gelê Kurd re ji bo sebra wan spas dikim, nemaze ji ber ku em dibînin ew di demên berê de bi gelek pirsgirêkan re rû bi rû mane, pirsgirêka bêkariyê an jî paşketina mûçeyan, ku dîsa pirsgirêkek bi hikûmeta federal re ye ku em bi berdewamî li ser xetê ne, ji bo çareseriyek bingehîn bibînin. Em li Herêma Kurdistanê me wekî Hikûmeta Herêma Kurdistanê hemî erkên xwe bi cih anîne û em bang li hikûmeta federal dikin ku erkên xwe yên li hember mafên darayî yên gelê Kurd bi cih bîne.

Ji aliyekî din ve, me di projeya ronîkirinê de ku me îsal soz dabû, hewlek cidî da ku 24 demjimêran elektrîk ji bo hemû Kurdistanê dabîn bikin û em li ser soza xwe ne ku hemû bajar, bajarok, gund û mezrayên Kurdistanê bigirin. Lêbelê, piştî pevçûn û êrîşên li ser zeviyên petrol û gazê, hin şîrketan wekî tedbîrek hilberîna xwe kêm kirine û ev yek bûye sedema kêmbûna demkî ya hilberîna elektrîkê. Em hêvî dikin ku rewş vegere rewşa normal. Ez hêvî dikim gelê me xwedî sebr be û fêm bike ku ev yek ji bilî daxwaza me qewimî, lê em ê hemû hewla xwe bidin ku zirara gelê Kurd kêm bikin û bi îzna Xwedê, ewlehî û aramî vegere Herêma Kurdistanê û tevahiya herêmê.

Em bang li hikûmeta federal dikin ku êdî rê nede van terorîstên derveyî yasayê ku êrîşî Kurdistanê bikin, ji ber ku em nikarin her û her bêdeng bimînin.

Careke din, ez dixwazim pîrozbahiyê li Hecî Ehmed, gelê Kurdistanê û bajarê Hewlêrê bikim. Ez dixwazim pîrozbahiyê li bijîşk û karmendan bikim ji bo vê xebata bêhempa ku wan li vir kirine. Serkeftin, pîrozbahiyê li we hemûyan dikim, bila Kurdistana me her parastî û avadan bimîne.

Taybetmendiyên giştî yê avahiyê

Nexweşxaneya Majidî li ser rûberê 50 hezar metreçargoşe hatiye avakirin û ji avahiyeke modêrn a 6 qatî pêk tê. Nexweşxane xwedî karîna 230 nivînan e û bi teknolojiyên herî nûjen ên serdemê hatiye avakirin, da ku xizmetguzariyên bijîşkî bi standardên cîhanî pêşkêş bike.

Beşên pispor û xizmetên bijîşkî

Nexweşxane zêdetirî 20 beşên şêwirmendiyê yên cuda li xwe digire, di nav wan de; Dil, Mêjî û Damar, Gurçik, Çav, Nexweşiyên Zarokan û Jinan hene. Herwiha beşên neştergeriyê yên wekî Hestî, Dil û Sîng, Qirik, Guh, Ciwankarî û neştergeriya zarokan.

Di warê radyolojî û destnîşankirinê de, nexweşxane bi amûrên herî pêşkeftî yên wekî MRI 3T, CT Scan (64 û 256 slice), X-Ray û Mammografiyê hatiye tîmarkirin. Her wiha yekeyên taybet ên wekî Qestereya Dil, IVF (zarokên lûleyî), Diyalîz û Çareseriya Kîmyewî (Chemotherapy) ji bo nexweşên pençeşêrê di xizmetê de ne.

Xizmetên mayînê û asankariyên giştî

Ji bo rihetiya nexweş û bijîşkan, nexweşxane xwedî van taybetmendiyan e:

- 122 odeyên asayî û 11 odeyên taybet (VIP).

- 12 holên neştergeriyê yên modêrn û beşa ICU ya bi 27 nivînan.

- Motêlekî taybet ji bo bijîşkan ku ji 70 odeyan pêk tê.

- Cihê niştina helîkopteran, ji bo veguhastina bilez a nexweşên di rewşa awarte de.

- Xwaringeh, kafeterya, holên konferansê û odeyeke podcastê.

420 derfetên kar hatin afirandin

Vekirina vê nexweşxaneyê ji bilî warê tenduristiyê, di warê aborî de jî giringiyeke mezin dide navçeyê. Ev proje dê derdora 420 derfetên kar ên rasterast ji bo kadroyên bijîşkî, kargêrî û teknîkî peyda bike, ku ev yek piştgiriyeke mezin e ji bo hêza kar a navxweyî û kêmkirina bêkariyê.

 

Basnews