Parlamenterê Efrînê yê Parlamentoya Sûriyeyê Mihemed Sîdo diyar kir ku 125 hezar Kurdên Helebê koçber bûne.

Sîdo bi rêya Rûdawê bangeke lezgîn li rêxistinên mirovî û Kurdên diyasporayê kir.

Mihemed Sîdo diyar kir ku piştî rûdanên dawî yên li Helebê, pêleke mezin a koçberiyê ber bi Afrînê ve dest pê kiriye.

Parlamenterê Efrînê amaje bi koçberiya xelkê Eşrefiye û Şêx Meqsûdê kir û got:

“Piştî rewşa dawî ya şer û pevçûnên li bajarê Helebê, xelkê me yê Kurd ê taxên Şêx Maqsûd û Eşrefiyeyê bi hejmareke mezin gihîşt herêma Efrînê.

Hejmara wan zêdetirî 125 hezar mirovî ye û zêdetirî 25 hezar malbatî ye.

Bi taybetî li vir li ber ofîsa rewşa civakî, me pêşwaziya xelkê xwe kir û me pêşwaziyeke germ li wan kir.

Em dibêjin dilê me û malên me ji we re vekirî ne. Malên me malên we ne, hûn di nav xelkê xwe de ne.

Ew kesên ku malên wan hebûn çûn gundên xwe û bi cih bûn lê mixabin hinek bi cilên li ser bedena xwe reviyan û hatin herêma Efrînê.

Ji ber ku hewcedarî gelekî mezin e, pêdiviya wan bi hemû pêdiviyên jiyanê û pêwîsiya jiyanê heye.”

Li aliyê din, Neteweyên Yekbûyî jî li ser şerê li Helebê daxuyaniî da û diyar kir ku nêzîkî 150 hezar kes koçber bûne. 

 

Rudaw