Komîsyona Yekîtiya Ewropayê, Rapora Tirkiyeyê ya sala 2025an weşand û amaje pê kir ku tayînkirina qeyûman "demokrasiya herêmî lawaz kiriye".

Wezareta Karên Derve ya Tirkiyeyê jî rapor red kir û wekî "alîgir û bêbingeh" bi nav kir.

Komîsyona Yekîtiya Ewropayê di rapora xwe de destnîşan kir ku dilgiranyên derbarê serxwebûna darazê didomin û fikarên li ser xirabûna standardên demokratîk, serweriya yaseyê û rêzgirtina li mafên bingehîn nehatine çareserkirin.

Komîsyonê diyar kir ku Tirkiyeyê di pêvajoya reforman de bipêşketineke sînordar bi dest xistiye û bang lê kir ku lihevhatina bi Yekîtiya Ewropayê re bihêz bike.

"Demokrasiya herêmî lawaz bûye"

Komîsyona Yekîtiya Ewropayê di raporê de bi taybetî li ser van xalan rawestiya:

Zexta li ser mixalefetê: Zexta zêde ya darazê ya li ser siyasetmedarên mixalefetê, bi astengkirina rikeberiya siyasî re, prensîbên bingehîn ên demokratîk lawaz kirine.

Sîstema serokatiyê: Di sîstema serokatiyê de, ji bilî hilbijartinan, mekanîzmayên hevsengî û kontrolê yên bibandor ji bo berpirsyarkirina hikûmetê nînin.

Birêvebiriya siyasîbûyî: Birêvebiriya giştî zêde siyasî bûye û piraniya saziyên rêziknameyê rasterast bi Serokatiyê ve hatine girêdan.

Qeyûm: Darizandin û dûrxistina ji kar a şaredarên mixalefetê yên ku hatine hilbijartin û tayînkirina qeyûman li şûna wan, demokrasiya herêmî lawaztir kiriye.

Tirkiye raporê red dike

Piştî weşandina raporê, Wezareta Karên Derve ya Tirkiyeyê daxuyaniyek belav kir û naveroka raporê red kir.

Wezareta di daxuyaniyê de got:

"Em îdiayên alîgir, pêşdaraz û bêbingeh ên di Rapora Komîsyona Yekîtiya Ewropayê ya Tirkiyeyê de yên derbarê darazê, mafên bingehîn û pêşhatên siyasî yên navxwe red dikin."

 

Rudaw