Wezareta Navxwe ya Hikûmeta Herêma Kurdistanê daxuyaniyek derbarê bûyerên li qeza Xebatê de belav kir û daxwaz ji xelkê navçeyê kir: ‘’Bi gotinên nehezan û palderiya destên bi guman neyên xapandin.’’

Îro 10.07.2025ê Wezareta Navxwe ya Hikûmeta Herêma Kurdistanê daxuyaniyek weşand û got: "Di encama nakokiyeke di navbera çend kesan de li ser pirsgirêkên erd, li herêma Xebatê ya parêzgeha Hewlêrê alozî û nearamiyek çêbû û bû sedemê ziyanên canî û darayî.’’

Herwaha hat ragehandin: "Bi hewldanên hikûmet û partî û hêzên ewlehiya navxweyî yên peywendîdar, pirsgirêk zû hate sînordarkirin û bi alîkariya xelkê herêmê, herêm aram bû û ji bo çareserkirina nakokiyan û cezakirina binpêkaran prosedurên qanûnî dest pê kirin.’’

Wezareta Navxwe bang li xelkê herêmê kir: "Bi gotinên dijminan û teşwîqkirina destên gumanbar neyên xapandin û li gorî rêbernameyên ewlehiyê tevbigerin û ji bo rakirina alozî û aramiya li herêmê bibin alîkar.’’

Di daxuyaniyê de her wiha hate tekez kirin ku aramî û ewlehiya hemû herêmên Herêma Kurdistanê ji her tiştî girîngtir e û destûr nayê dayîn ku kes ji bo ti armancekê bêaramî û aloziyê pêş bixe.

Wezareta Navxwe welatiyên Herêma Kurdistanê piştrast dike: "Kurdistan dê herêma herî aram a herêmê bimîne.’’

 

Basnews