Rêberê Girtî yê Partiya Karkerên Kurdistanê (PKK) Abdullah Ocalan peyamek ji Zanîngeha Kobaniyê re şand û pîrozbahî li xwendekar, akademîsyen û xebatkarên wê kir.

Abdullah Ocalan û girtiyên din ên li Girtîgeha Îmraliyê 7ê Hezîrana 2025an bi helkefta Cejna Qurbanê li gel malbatên xwe hevdîtinek pêk anîbû.

Parlamenterê DEM Partiyê Omer Ocalanê ku biraziyê Abdullah Ocalan e jî beşdarî hevdîtinê bûbû.

“Hemû xebatkar, kedkar, xwendekar û akademîsyenên zanîngehê pîroz kirin”

Omer Ocalan doh li ser hesabê xwe yê Xê ragihand ku Abdullah Ocalan di wê hevdîtinê de peyamek ji Zanîgeha Kobaniyê ya Rojavayê Kurdistanê re şandiye û got:

"Di hevdîtina me ya Cejna Qurbanê de Birêz Abdullah Ocalan silavên xwe ji Zanîngeha Kobaniyê re şandin û hemû xebatkar, kedkar, xwendekar û akademîsyenên zanîngehê pîroz kirin.”

Parlamenterê DEM Partiyê ragihand ku Abdullah Ocalan di hevdîtinê qîmet û girîngiyeke zêde daye xebatên Zanîngeha Kobaniyê û li pey çû:

"Zanîngeh wek bingeh û hêlîna avakirina fikriyeta azadî, wekhevî û demokrasiyê nirxand. Li dijî Modernîteya Kapîtalîst û dubareyên burokratîk û akademîk; mîsyoneke nû û modern a azadiya ramanî û afirandina fikrî li hebûna zanîngehê bar kir.

Li ser term, têgeh û nêzîkatiya paradîgma û perspektîfa nû, bi hebûna Zanîngeha Kobaniyê bi kelecan û serbilind bû û di xebatan de serkeftin ji zanîngeh û xwendekaran re xwest.”

Zanîngeha Kobaniyê ya li bajarê Kobaniyê yê Rojavayê Kurdistanê 30ê Îlona 2017an bi merasîmeke fermî hat vekirin.

Kar û barên avahîsaziyê yên zanîngehê 2018an dest pê kir û sala 2023yan temam bûn.

Zanîngeh ji 12 fakulteyan pêk tê ku fakulteyên perwerde, bijîşkî, zanistên xwezayî, teknolojî û çend fakulteyên din tê de ne.

Ew zanîngeh piştî şerê dijwar ê li dijî DAIŞê û rizgarkirina bajêr, wekî pêngaveke girîng ji bo jinûveavakirinê û bipêşxistina perwerdeya bi zimanê dayîkê yê Kurdî li herêmê hat vekirin û nêzîkî 3 hezar xwendekarên wê hene.

 

Rudaw