Sendîkaya Parêzerên Kurdistanê beyanameyek derbarê biryara Wezareta Darayî ya Iraqê ya ji bo birîna mafên darayî yên Herêma Kurdistanê belav kir û ragehand: ‘’Mûçegirên Herêma Kurdistanê li gor destûr û yasa, heman maf û îmtiyazên mûçegirên beşên din ên Iraqê heye.’’

Sendîkaya Parêzerên Kurdistanê îro 05.06.2025ê daxuyaniyek weşand û got: "Mixabin, di demekê de ku her kes li bendê bû ku Wezareta Darayî ya Federal û hikûmeta federal erkên xwe yên li hember welatiyan û karmendên mûçegir bicîh bînin û mafên darayî li gor peymana ku hatiye îmza kirin bişîne, lê berovajî wê bê liberçavgirtina destûr û yasaya budceyê û biryarên Dadgeha Federal jî bi awayekî bêxem, yekalî û neqanûnî biryar da ku mafên darayî û mûçeyên fermanberan, kesên kêmendam û xizmên şehîdan rawestîne.’’

Herwaha hat ragehandin: "Reftara neqanûnî ya Wezareta Darayî ya Iraqê, ku cezayekî komî û civakî yê mûçegirên Herêma Kurdistanê ye, li gorî destûr û qanûnê, mûçegirên Herêma Kurdistanê xwediyê heman maf û îmtiyazên beşên din ên Iraqê heye û ev yek li gel prensîbên yasayî hevdu nagre û mixabin Civata Wezîran a Hikûmeta Federal jî desthilata xwe yasayî ji bo şandina mûçe bikar neanî.’’

Di daxuyaniyê de wiha tê gotin: "Em bang li hikûmeta federal û Wezareta Darayî dikin ku biryara xwe ji nû ve binirxînin û mûçe û mafên darayî yên karmendan û Herêma Kurdistanê di zûtirîn dem de bişînin, da ku nekevin bin zexta ti partî û komên neqanûnî."

Sendîkayê got: "Em ji rayedarên Iraqê re bibîrtînin ku bicîhanîna bendên destûrê garantiya yekparçeyî û yekitiya Iraqê ye."

 

Basnews