Li Kerkûkê çekdarên DAIŞê êrîşî hêzên Iraqê kir û di encamê de 2 serbazên Iraqî hatin kuştin.

Berpirsê Ragihandina Polîsê Kerkûkê, Efrasiyaw Kamîl êrîşa DAIŞê piştrast kir û got, çekdarên DAIŞê li başûrê navçeya Tawûqê xaleke kontrolê ya artêşa Iraqê kirine armanc.

Bi gotina Afrasiyaw Kamîl, êrîş bi çekên sivik pêkhatiye û di encamê de 2 serbazên Iraqî hatine kuştin.

Şaneya Ragihandina Cengî jî derbarê êrîşî de daxuyaniyek belav kir û ragihand, çekdarên DAIŞê li ser riya navbera Bexda-Daqûqê, li parêzgeha Kerkûkê teqe li xaleke pişkinînê ya hêzên ewlehiyê kirine, û di encamê de 2 serbazên Lîwaya 45 a Iraqê hatine kuştin.

Çekdarên DAIŞê di van demê dawiyê de li bakûrê Bexdayê jî êrîşî xalên pişkinînê yên Artêşa Iraqê û Heşda Şeibî kiribûn.

Ew zêdetirî du salan e, ku roj li pey rojê liv û tevgera çekdarên DAIŞê li sînorê parêzgehên Kerkûk, Selahedîn, Diyale, Mûsil û Enbarê zêdetir dibin.

Kerkûk ji sala 2017ê ve û piştî bûyerên 16ê Cotmehê di bin kontrola hêzên artêşa Iraqê û Heşda Şeibî de ye û ti hêzên Kurdî yên ser bi Hikûmeta Herêma Kurdistanê ve li vê parêzgehê nemane.

Rudaw