Berpirsê ragehandina rêveberiya giştî ya karûbarên mîn li parêzgeha Duhokê ragehand, li parêzgeha Duhokê 775 zeviyên mînkirî hene û heta naha 370 zeviyên mînkirî hatine paqij kirin. Herwaha diyar kir ji sala 2008ê heta 2022yê li Duhokê 113 kes bûne qurbana mîn û teqemeniyan ku ji wan jî 39 kesan canê xwe ji dest dane û 74 kes jî birîndar bûne.

Berpirsê ragehandin rêveberiya giştî ya karûbarên mîn li parêzgeha Duhokê Rêgir Bêsfikî ji BasNewsê re ragehand: ‘’Ji 775 zeviyên mînkirî heta naha 370 zevî hatine paqij kirin û hîn 405 zeviyên mînkirî mane ku dike 32 milyon donim erd û heta naha sedî 39ê wan hatine paqij kirin. Lê hîn gelek cîhên mînkirî nehatina tomar kirin ku piraniya wan li Amêdî û devera Berwarî ne. PKKê jî gelek cîh mîn kirine û me nekariye kar li wan deveran bikin.’’

Herwaha diyar kir: ‘’Tenê li qeza Amêdiyê 298 zeviyên mînkirî hene, li Sersingê 42 zeviyên mînkirî hene, ji wan jî 24 zevî hatine paqij kirin û li Kanî Masî 122 zeviyên mînkirî hene û ji wan 8 zevî hatine paqij kirin. Li Çemankê 52 zeviyên mînkirî hene û ji wan 17 zevî hatine paqij kirin. Li Bamernê 19 zeviyên mînkirî hene ji wan 9 zevî hatine paqij kirin û li Amêdiyê 26 zeviyên mînkirî hene ku tenê 6 zevî hatine paqij kirin û li Dêrelûkê jî 37 zevî mînkirî ne û ji wan ji 14 zevî hatine paqij kirin.’’

Berpirsê ragehandina rêveberiya giştî ya karûbarên mîn li parêzgeha Duhok got: ‘’Çar karmendên mîn li Duhokê di dema şerê terorîstên DAIŞê de şehîd bûn û 6 karmend jî birîndar bûn. Naha du tîm berdewam karê paqijkirina zeviyên mînkirî dikin. Çend roj berî naha zeviyekî mînkirî li Mangişkê hat paqij kirin û dawî bû. Naha dîsa mijûlê hin zeviyên minkirî yên dema rejîma dîktator a Beis a Iraqê ne ku wê rejîmê gelek cîh mînkiribû.’’

 

Basnews